भक्तपुर । जावलाखेल युथ क्लब पोखरामा जारी २३ औं संस्करणको आहा रारा पोखरा गोल्डकप २०८० को सेमिफाइनलमा प्रवेश गरेको छ ।
सोमवार भएको क्वाटरफाइनल खेलमा मनाङ मर्स्याङदी क्लबलाई ट्राइब्रेकरमा ७–६ गोलअन्तरले पराजित गर्दै जावलाखेल सेमिफाइनलमा प्रवेश गरेको हो ।
जावलाखेलको जितमा कप्तान विशाल तामाङ, पुस्कर खड्का, छिरिङ लामा, प्रवेश कुँवर, हरिस राज भट्ट, शिशिर लेखी र प्रदिप बुढाथोकीले गोल गर्दा हिसुब थपलिया र सेवान्त थापाको प्रहार भने मनाङका गोलकिपर जियारथ शेखले विफल पारिदिए ।
यता, मनाङका लागि भने जय गुरुङ, अशोक खवास, सुदिप श्रेष्ठ, अश्विन घोरासैनी, लक्षु थापा मगर र जियारथ शेखले गोल गर्दा निशान लिम्बु सुरज सिंह र रणदिप पौडेलको प्रहार जावलाखेलका गोलकिपर युनेश चौधरीले बचाए ।
युनेश खेलको म्यान अफ द म्याच समेत चुनिए ।
त्यसअघि पोखरास्थित पोखरा रंगशालामा भएको खेलमा दोस्रो हाफको ५५ औं मिनेटमा सुदिप श्रेष्ठको पासमा हिसुब थपलियाले गोल गर्दै जावलाखेललाई १–० ले अघि बढाए ।
तर, खेलको ८९ औं मिनेटमा राजेश परियारले मनाङका लागि गोल फर्काउँदा खेल १–१ को बराबरीमा बराबरीमा आयो ।
निर्धारित ९० मिनेटको खेल बराबरीमा सकिएपछि खेल अतिरिक्त ३० मिनेट लम्बियो ।
तर, उक्त समयमा दुबै टोलीबाट थप गोल ननिस्केपछि खेलको निर्णय ट्राइब्रेकरबाट लिइयो ।
हारसंगै ६ पटकका विजेता मनाङ प्रतियोगिताबाट बाहिरिएको छ ।
लेखक
