भक्तपुर । भारतिय क्लब मानेभन्ज्याङ एफसीमाथि फराकिलो जित निकाल्दै मछिन्द्र फुटबल क्लब दोस्रो संस्करणको केपी ओली कप फुटबल च्याम्पियनसिपको फाइनलमा प्रवेश गरेको छ ।
विहिवार भएको दोस्रो सेमिफाइनल खेलमा दार्जलिङको क्लब मानेभन्ज्याङ एफसीमाथि साविक विजेता मछिन्द्र एफसीले ५–० को फराकिलो जित निकाल्दै केपी ओली कपको फाइनलमा प्रवेश गरेको हो ।
काठमाडौंको त्रिपुरेश्वरस्थित दशरथ रंगशालामा भएको खेलमा उपाधि रक्षा गर्ने अभियानमा रहेको मछिन्द्रका लागि विमल घर्तिमगर, स्टेफेन बिनोङ, हिसुब थपलिया, देबेन्द्र तामाङ र आयुष घलानले गोल गरे ।
स्टार खेलाडीहरुले भरिएको मछिन्द्रका लागि खेलको २६ औं मिनेटमा विमलले गोल गर्दै १–० को अग्रता दिलाए ।
त्यसको दुई मिनेटपछि नै स्टेफेनले गोल थप्दा मछिन्दै २–० ले अघि बढ्यो ।
यता, ३६ औं मिनेटमा हिसुबले गोल थप्दा मछिन्द्र पहिलो हाफसम्ममा ३–० को आरामदायी अग्रतासहित अघि बढ्यो ।
दोस्रो हाफको ५३ औं मिनेटमा उत्सब राईको कर्नरमा देबेन्द्रले गोल गर्दा मछिन्द्र ४–० ले अघि बढ्यो ।
त्यस्तै, खेलको अन्त्यतिर इन्जुरी समयको तेस्रो मिनेटमा आयुषले गोल थप्दा मछिन्द्रले ५–० को फराकिलो जित हासिल गर्न सफल रह्यो ।
त्यसअघि दशरथ रंगशालामा विहिवार नै भएको पहिलो खेलमा जावलाखेल युथ क्लबलाई ३–० ले पराजित गर्दै न्युरोड टिम (एनआरटी) फाइनलमा केपी ओली कपको प्रवेश गरेको छ ।
एनआरटीको जितमा सञ्जिब बिष्टले दुई गोल गर्दा विवेक गुरुङले एक गोल गरे ।
खेल सुरु भएको पाँचौ जितमा विवेकले गोल गर्दै एनआरटीलाई सुरुवाती अग्रता दिलाए ।
त्यसपछि दोस्रो हाफको ४९ औं मिनेटमा सञ्जिबले गोल गर्दै एनआरटीलाई २–० ले अघि बढाए ।
त्यस्तै, ५६ औं मिनेटमा सञ्जिबले व्यक्तिगत रुपमा दोस्रो गोल गर्दा एनआरटी ३–० ले विजयी भयो ।
अब उपाधिका लागि साविक विजेता मछिन्द्र एफसी र एनआरटीले सनिबार फाइनल खेलमा प्रतिस्पर्धा गर्नेछ ।
लेखक
