एजेन्सी । संयुक्त राज्य अमेरिकामा जारी कोपा अमेरिकाअन्तर्गत खेलमा भेनेजुएलाले जमैकामाथि सहज जित निकालेको छ ।
सोमवार विहान भएको खेलमा भेनेजुएलाले जमैकामाथि ३–० को सहज जित निकालेको हो ।
टेक्सासको नर्थ अस्टिनस्थित क्यु टु स्टेडियममा भएको खेलमा भेनेजुएलालाई जिताउन इडुवार्ड बेल्लो, सलोमोन रोनडन र इरिक रामिरेजले गोल गरे ।
पहिलो हाफ गोलरहित बराबरीमा सकिएको खेलमा दोस्रो हाफको ४९ औं मिनेटमा जोन अरामबुरुको पासमा बेल्लोले गोल गर्दै भेनेजुयलालाई सुरुवाती अग्रता दिलाए ।
त्यसपछि ५६ औं मिनेटमा याङगेल हरेराको पासमा रोनडनले गोल थप्दा भेनेजुएला २–० ले अघि बढ्यो ।
यता, ८५ औं मिनेटमा कार्भिन आन्ड्राडेको पासमा रामिरेजले गोल थप्दा भेनेजुएला ३–० ले विजयी भयो ।
सहज जितसंगै भेनेजुएलाले समूह ‘बी’ मा ३ खेलबाट शतप्रतिशत जितका साथ ९ अंक जोड्दै समूह विजेता बन्दै अघिल्लो चरणमा प्रवेश गर्यो ।
पराजित जमैकाले भने समूह चरणमा अंकको खाता नै खोल्न सकेन ।
जमैका समूह तालिकाको पुच्छारमा रह्यो ।
त्यस्तै, सोमवार विहानै भएको सोहि समूहको अर्को खेलमा इक्वेडर र मेक्सिकोले गोलरहित बराबरी खेलेका छन् ।
अरिजोनाको ग्लेनडेलस्थित स्टेट फार्म स्टेडियममा भएको खेलमा दुबै टोलीले गोलका केहि राम्रा अवसर सिर्जना गरे तापनि गोल भने निकाल्न नसक्दा खेल गोलरहित बराबरीमा सकियो ।
बराबरीसंगै दुबै टोलीले अंक बाँडेका छन् ।
दुबै टोलीको समान ३ खेलबाट ४ अंक रहे पनि गोलअन्तरका आधारमा इक्वेडर अघिल्लो चरणमा प्रवेश गर्दा मेक्सिको भने अभागी सावित भयो ।
लेखक
