एजेन्सी । भारतले दक्षिण अफ्रिकाविरुद्वको टि–२० आई सिरिज जितेको छ ।
शुक्रवार राति भएको सिरिज अन्तर्गत चौथौं तथा अन्तिम खेलमा दक्षिण अफ्रिकालाई १३५ रनले हराउँदै सिरिज ३–१ ले जितेको हो ।
त्यसअघि सिरिजअन्तर्गत पहिलो खेल भारतले ६१ रनले जित्दा दोस्रो खेल भने दक्षिण अफ्रिकाले ३ विकेटले जितेको थियो ।
त्यस्तै, तेस्रो खेलमा भारतले दक्षिण अफ्रिकामाथि ११ रनको जित निकालेको थियो ।
दक्षिण अफ्रिकाको डिपी ओर्ल्ड वानडेरेर्स रंगशालामा भएको अन्तिम खेलमा टस जितेर पहिला ब्याटिङ रोजेको भारतले निर्धारित २० ओभरको खेलमा १ विकेट गुमाएर २८३ रनको विशाल स्कोर बनायो ।
यो भारतको टि–२० खेलमा दोस्रो ठूलो स्कोर हो ।
त्यसअघि भारतले बंगलादेशविरुद्व सन् २०२४ मै भएको टि–२० खेलमा २९७ रन बनाएको थियो ।
भारतका लागि ओपनर ब्याट्सम्यान तथा विकेटकिपर सन्जु सामसन र तिलक बर्माले शतक प्रहार गरे ।
तिलकले बिष्पोटक पारी खेल्नेक्रममा ४७ बलमा ९ चौका र १० छक्का प्रहार गर्दै १२० रन जोड्दै अविजित रहँदा सन्जुले ५६ बलमा ६ चौका र ९ छक्का प्रहार गर्दै १०९ रन जोडेर अविजित रहे ।
त्यस्तै, अर्का ओपनर अभिषेक शर्माले १८ बलमा २ चौका र ४ छक्का प्रहार गर्दै ३६ रन जोडेर पेविलियन फर्किए ।
भारतले अतिरिक्त रुपमा १८ रन जोड्यो ।
घरेलु टोलीका लागि लुथा सिपाम्लाले १ विकेट लिए ।
२८४ रनको विशाल विजयी लक्ष्यका साथ जवाफी ब्याटिङमा उत्रिएको दक्षिण अफ्रिका भने १८.२ ओभरमा अलआउट हुन पुग्दा मात्र १४८ रनमा समेतियो ।
घरेलु टोलीका लागि ट्रिस्टन स्टुब्सले २९ बलमा ३ चौका र २ छक्का प्रहार गर्दै ४३ रन जोड्दा डेभिड मिल्लरले २७ बल खेल्नेक्रममा २ चौका र ३ छक्का प्रहार गर्दै ३६ रन जोडेर पेविलियन फर्किए ।
त्यस्तै, मार्को जेनसेनले १२ बलमा २ चौका र ३ छक्का प्रहार गर्दै २९ रन जोडेर अविजित रहँदा गेराल्ड कोएट्जेले ८ बल खेल्दै १ चौका र १ छक्का प्रहार गरेर १२ रन बनाउँदै पेविलियन फर्किए ।
यता, कप्तान ऐडेन मार्करम ८, केशव महाराज ६, लुथो सिपाम्ला ३, एन्डेल सिमेलेन २ र रायन रिकेल्टन १ रनमा आउट हुँदा दक्षिण अफ्रिकाका अन्य दुई ब्याटर अंकको खाता नै नखोली पेविलियन फर्किए ।
घरेलु टोलीले अतिरिक्त रुपमा ८ रन जोड्यो ।
भारतका लागि अर्शदिप सिंहले ३ विकेट लिँदा वरुण चक्रबर्ती र अक्षर पटेलले २–२ तथा हार्दिक पाण्डेया, रमणदिप सिंह र रबि बिस्नोईले १–१ विकेट लिए ।
लेखक
