एजेन्सी । युरोपेली क्लब फुटबलको सर्वाधिक लोकप्रिय प्रतियोगिता युईएफए च्याम्पियन्स लिगको अन्तिम १६ अन्तर्गत दोस्रो लेग खेलका चार खेलहरु बुधवार र विहिवार राति सम्पन्न भए ।
युरोपेली क्लब फुटबलको सर्वोच्च प्रतियोगिताको प्रि–क्वाटरफाइनलको दोस्रो लेग खेलमा जर्मन महारथी क्लब ब्रायन म्युनिख, इंग्लिस क्लब चेल्सी र पोर्चुगिच क्लब बेन्फिकाले जित हात पार्दा इंग्लिस क्लब टोटनहम हटस्पर र इटालियन क्लब एसी मिलानले गोलरहित बराबरी खेले ।
अन्तिम १६ को दोस्रो लेग खेलअन्तर्गत विहिवार राति दुई खेल सम्पन्न भए ।
उपाधि दावेदार मानिएको दुई बलिया टोली जर्मन महारथी ब्रायन म्युनिख र फ्रान्सेली महारथी पेरिस सेन्ट जर्मन (पिएसजी) बुडेसलिगा क्लबको घरेलु मैदान एलियान्ज एरिनामा आमनेसामने भएका थिए ।
जसमा घरेलु टोलीले बाजी मार्यो । ब्रायनले पिएसजीलाई २–० ले हराउँदा समग्रमा ३–० को जित निकालयो ।
यसअघि पहिलो लेग खेलमा यी दुई हेभिवेट टोली पिएसजीको घरेलु मैदानमा भिडेका थिए । त्यहाँ पनि ब्रायनले १–० ले खेल जितेको थियो ।
जितसंगै महत्वपूर्ण जितसंगै ब्रायनले क्वाटरफाइनलमा स्थान बनाउँदा पिएसजीको च्याम्पियन्स लिग जित्ने महत्वकान्छा फेरी एकपटक अन्तिम १६ बाटै तुहिएको छ ।
विहिवार राति नै भएको अर्को खेलमा प्रिमियर लिग क्लब टोटनहम हटस्पर र एसी मिलान टोटनहम हटस्पर रंगशालामा आमनेसामने भएका थिए ।
पहिलो लेग खेलमा इंग्लिस टोली टोटनहम इटालियन टोली एसी मिलानसंग १–० ले पराजित भएको थियो । त्यसैले घरेलु मैदानमा स्पर्सका रुपमा समेत चिनिने टोटनहमलाई प्रतियोगितामा कायम रहन जित्नै पर्ने थियो ।
तर, खेल गोलरहित बराबरीमा सकिँदा टोटनहम समग्रमा १–० को हार बेर्होदै प्रतियोगिताबाट बाहिरियो । यता, मिलान भने सन् २०१२ पछि पहिलोपल्ट च्याम्पियन्स लिगको क्वाटरफाइनल प्रवेश गर्यो ।
यसअघि बुधवार राति पनि दुई खेल भएका थिए । इंग्लिस क्लब चेल्सीले जर्मन क्लब बुरुसिया डर्टमन्डलाई स्टामफोर्ड ब्रिज रंगशालामा निम्त्याएको थियो ।
लण्डन क्लबको घरेलु मैदानमा भएको खेलमा घरेलु टोलीले डर्टमण्डमाथि २–० को जित निकाल्यो । त्यसअघि पहिलो लेग खेलमा बुडेसलिगा क्लबले १–० को जित निकालेको थियो ।
यता, दोस्रो लेग खेलमा २ गोल बेहोरेपछि डर्टमण्ड समग्रमा २–१ ले पछि पर्दै प्रतियोगिताबाट बाहिरिदा जारी सिजन लयमा आउन निक्कै संर्घष गरिरहेको प्रिमियर लिग क्लबले अन्तिम ८ को स्थान सुरक्षित गर्यो ।
त्यस्तै, बुधवार राति नै भएको अर्को खेलमा पोर्चुगिच क्लब बेन्फिकाले बेल्जियम टोली क्लब बुर्गमाथि ५–१ को फाराकिलो जित रच्यो ।
पहिलो लेग खेलमा पनि पोचुगिच टोलीले २–० को जित हात पारेको थियो । बेन्फिकाले समग्रमा ७–१ को जित निकाल्दै च्याम्पियन्स लिगको क्पाटरफाइनल स्थान सुरक्ष्नित गर्यो ।
यता, बेल्जियम क्लब भने पराजयसंगै प्रतियोगिताबाट बाहिरिएको छ ।
च्याम्पियन्स लिग अन्तर्गत अन्तिम १६ अन्तर्ग दोस्रो लेगको बाँकी चार खेल आउँने बुधवार र विहिवार राति हुनेछ ।
लेखक
