एजेन्सी । इटालियन फुटबलको शीर्ष लिग सिरी ए अन्तर्गत खेलमा युभेन्टसले बोलोग्नामाथि पुनरागमन बराबरी खेलेको छ ।
सोमवार राति भएको खेलमा एक समय तीन गोलले पछि परेको स्थितिलाई उल्ट्याउँदै युभेन्टसले बोलोग्नामाथि ३–३ को बराबरी खेलेको हो ।
बोलोग्नाको घरेलु मैदान रेनाटो डलएरा रंगशालामा भएको खेलमा रिकार्डो कालाफियोरीले दुई गोल गर्दा सान्टियागो कास्ट्रोले एक गोल थपे ।
यता, भ्रमणकारी टोली युभेन्टसका लागि फेडेरिको चिएसा, एरिक मिलिक र केनान यलदिजले समान एक–एक गोल फर्काए ।
खेल सुरु भएको दोस्रो मिनेटमा कालाफियोरीले गोल गर्दै घरेलु टोलीलाई सुरुवाती अग्रता दिलायो ।
त्यसपछि ११ औं मिनेटमा काकपेर उवार्नस्कीको पासमा कास्ट्रोले गोल थप्दा बोलोग्ना २–० ले अघि बढ्यो ।
यता, दोस्रो हाफको ५३ औं मिनेटमा कास्ट्रोकै पासमा कालाफियोरीले व्यक्तिगत रुपमा दोस्रो गोल गर्दा बोलोग्ना ३–० को आरामदायी अग्रतासहित अघि बढ्यो ।
तर, चिएसाले ७६ औं मिनेटमा युभेन्टसका लागि गोल फर्काउँदा खेल ३–१ को अवस्थामा आयो ।
त्यसपछि ८३ औं मिनेटमा युभेन्टसका लागि मिलिकले गोल फर्काउँदा खेल ३–२ को रोमाञ्चक अवस्थामा आयो ।
लगत्तै त्यसको एक मिनेटपछि नै युभेन्टसका यलदिजले गोल गर्दा खेल ३–३ को बराबरीमा आयो ।
पुनरागमन बराबरीसंगै महत्वपूर्ण एक अंक पाएको युभेन्टसले ३७ खेलमा ६८ अंक जोड्दै लिग तालिकाको चौथौं स्थानमा कायम रहेको छ ।
घरेलु टोली बोलोग्नाको पनि समान ३७ खेलमा ६८ अंक अंक भएतापनि गोलअन्तरका आधारमा तालिकाको तेस्रो स्थानमा कायम रह्यो ।
लेखक
