एजेन्सी । रोयल च्यालेन्जर्स बेङ्गलुरुले १८ औं संस्करणको इन्डियन प्रिमियर लिग (आईपिएल) को उपाधि जितेको छ ।
मंगलवार राति भएको फाइनल खेलमा पञ्जाब किंग्समाथि ६ रनको रोमाञ्चक जित हासिल गर्दै रोयल च्यालेन्जर्स बेङ्गलुरुले आईपिएलको उपाधि जितेको हो ।
योसंगै आईपिएलले बेङ्गलुरुका रुपमा नयाँ विजेता पाएको छ ।
पराजित पञ्जाब भने उपविजेतामै सिमित बन्यो ।
भारतको अहमदाबादस्थित नरेन्द्र मोदी रंगशालामा भएको उपाधि भिडन्त खेलमा १९१ रनको विजयी लक्ष्य पछ्याएको पञ्जाब निर्धारित २० ओभरको खेलमा ७ विकेट गुमाउँदै मात्र १८४ रनमा समेतियो ।
पञ्जाबका लागि शशांक सिंहले ३० बलमा ३ चौका र ६ छक्का प्रहार गरेर ६१ रनको अर्धशतकिय पारी खेल्दै अविजित रहँदा विकेटकिपर जोश इंग्लिसले २३ बल खेलेर १ चौका र ४ छक्का प्रहार गर्दै ३९ रन बनाएर पेविलियन फर्किए ।
त्यस्तै, ओपनर ब्याट्सम्यान प्रियान्स आर्याले १९ बलमा ४ चौका प्रहार गर्दै २४ रन जोडेर आउट हुँदा अर्का ओपनर प्रभसिमरन सिंहले २२ बल खेल्नेक्रममा २ छक्का प्रहार गर्दै २६ रन जोडेर पेविलियन फर्किए ।
यता, नेहाल वाधेराले १८ बलमा १ छक्का प्रहार गर्दै १५ रन जोडेर आउट हुँदा मार्कुस स्टोइनिस ६ तथा कप्तान श्रेयस अय्यर र अज्मतुल्लाह ओमारजायी १–१ रनमा पेविलियन फर्किए ।
केयल जेमिसन शुन्य रनमा अविजित रहे ।
पञ्जाबले अतिरिक्त रुपमा ११ रन जोड्यो ।
पञ्जाबमाथि सनसनी जित रच्न बेङ्गलुरुका लागि भुवनेश्वर कुमार र कुर्णाल पाण्डेयाले समान २–२ विकेट लिँदा यश दयाल, जोश हाज्लेउड र रोमारियो शेफर्डले १–१ विकेट लिए ।
त्यसअघि टस हारेर पहिला ब्याटिङमा उत्रिएको बेङ्गलुरुले निर्धारित २० ओभरको खेलमा ९ विकेट गुमाएर १९० रन जोड्यो ।
बेङ्गलुरुका लागि ओेपनर ब्याट्सम्यान विराट कोहोलीले ३५ बलमा ३ चौका प्रहार गर्दै ४३ रन जोड्दा लैम लिभिङस्टोनले १५ बल खेल्दै २ छक्का प्रहार गरेर २५ रन बनाएर पेविलियन फर्किए ।
त्यस्तै, कप्तान रजत पातिदारले १६ बलमा १ चौका र २ छक्का प्रहार गर्दै २६ रन जोडेर पेविलियन फर्किदा मयङ्क अग्रवालले १८ बलमा २ चौका र १ छक्का प्रहार गर्दै २४ रन जोडेर भए ।
यता, विकेटकिपर जितेश शर्माले १० बलमा २ चौका र २ छक्का प्रहार गर्दै २४ रन बनाएर आउट हुँदा रोमेरो शेफर्डले ९ बल खेल्नेक्रममा १ चौका र १ छक्का प्रहार गर्दै १७ रन जोडेर पेविलियन फर्किए ।
अर्का ओपनर फिल साल्टले ९ बलमा २ चौका र १ छक्का प्रहार गर्दै १६ रन जोडेर आउट हुँदा कुर्णाल पाण्डेया ४ र भुवनेश्वर कुमार १ रनमा पेविलियन फर्किए ।
यश दयाल भने १ रनमा अविजित रहे ।
बेङ्गलुरुले अतिरिक्त रुपमा ९ रन जोड्यो ।
पञ्जाबका लागि अर्शदिप सिंह र केयल जेमिसनले समान ३–३ विकेट लिँदा अज्मतुल्लाह ओमारजायी, विजय कुमार र युजभेन्द्र चाहलले १–१ विकेट लिए ।
लेखक
