एजेन्सी । भारतमा जारी इन्डियन प्रिमियर लिग (आईपिएल) अन्तर्गत इलिमिनेटर खेलमा रोयल च्यालेजर्स बेङ्गलोरुमाथि जित निकाल्दै राजस्थान रोयल्स क्वालिफायर २ मा प्रवेश गरेको छ ।
बुधवार राति भएको आईपिएलअन्तर्गत इलिमिनेटर खेलमा बेङ्गलोरुमाथि ४ विकेटको जित निकाल्दै राजस्थान रोयल्स क्वालिफायर २ मा प्रवेश गरेको हो ।
अब राजस्थानले क्वालिफायर दुईमा सनराइजर्स हैदराबादसंग फाइनल प्रवेशका लागि प्रतिस्पर्धा गर्ने भएको छ ।
पराजित बेङ्गलुरु भने प्रतियोगिताबाट बाहिरिएको छ ।
अहमदाबादस्थित नरेन्द्र मोदी रंगशालामा भएको खेलमा १७३ रनको विजयी लक्ष्यका साथ जवाफी ब्याटिङमा उत्रिएको राजस्थानले १९ ओभर खेल्नेक्रममा ६ विकेट गुमाउँदै १७४ रन जोड्यो ।
राजस्थानलाई महत्वपूर्ण जित दिलाउन ओपनर ब्याट्सम्यान यश्वस्वी जैसवालले ३० बलमा ८ चौका प्रहार गर्दै ४५ रन जोड्दा रियान परागले २६ बल खेलदै २ चौका र २ छक्का प्रहार गर्दै ३६ रन जोडेर पेविलियन फर्किए ।
त्यस्तै, शिमरन हेटमायरले १४ बलमा ३ चौका र १ छक्का प्रहार गर्दै २६ रन जोडेर आउट हुँदा अर्का ओपनर टम कोहलेर काडमोरले १५ बल खेल्नेक्रममा ४ चौका प्रहार गर्दै २० रन जोडेर पेविलियन फर्किए ।
यता, कप्तान तथा विकेटकिपर सन्जु सामसनले १३ बलमा १ छक्का प्रहार गर्दै १७ रन जोडेर आउट हुँदा रोभम्यान पोवेलले ८ बलमा खेल्दै २ चौका र १ छक्का प्रहार गर्दै १६ रन जोडेर अविजित रहे ।
ध्रुव जुरेल ८ रनमा रनआउट हुँदा रविचन्द्र आश्विन शुन्य रनमा अविजित रहे ।
राजस्थानले अतिरिक्त रुपमा ६ रन जोड्यो ।
बेङ्गलुरुका लागि मोहम्मद सिराजले ४ ओभर बलिङ गर्नेक्रममा ३३ रन दिएर २ विकेट लिँदा लोकी फर्गुसन, कर्ण शर्मा र क्यामरन ग्रिनले समान १–१ विकेट लिए ।
त्यसअघि टस हारेर पहिला ब्याटिङमा उत्रिएको बेङ्गलुरुले निर्धारित २० ओभरको खेलमा ८ विकेट गुमाउँदै १७२ रन जोड्यो ।
बेङ्गलुरुका लागि ओपनर ब्याट्सम्यान विराट कोहोलीले २४ बलमा ३ चौका र १ छक्का प्रहार गर्दै ३३ रन जोडेर आउट हुँदा रजत पातिदारले २२ बल खेल्दै २ चौका र २ छक्का प्रहार गर्दै ३४ रन जोडेर पेविलियन फर्किए ।
त्यस्तै, माहिपाल लोमरोरले १७ बल खेल्दै २ चौका र २ छक्का प्रहार गदैए ३२ रन जोडेर पेविलियन फर्किदा क्यामरन ग्रिनले २१ बलमा २ चौका र १ छक्का प्रहार गर्दै २७ रन जोडेर आउट भए ।
अर्का ओपनर तथा कप्तान फाफ दु प्लेसिसले १४ बलमा २ चौका र १ छक्का प्रहार गर्दै २७ रन जोडेर आउट हुँदा विकेटकिपर दिनेश कार्तिकले १३ बलको सामना गर्दा १ चौका मद्दतमा ११ रन जोडेर पेविलियन फर्किए ।
यता, स्वप्निल सिंह ९ रनमा अविजित रहँदा कर्ण शर्मा ५ र ग्लिन म्याक्सवेल शुन्य रनमा पेविलियन फर्किए ।
बेङ्गलुरुले अतिरिक्त रुपमा ४ रन जोड्यो ।
राजस्थानका लागि आभेस खानले ४ ओभर बलिङ गर्दै ४४ रन खर्चिएर ३ विकेट लिँदा रविचन्द्र आश्विनले ४ ओभरमा १९ रन दिएर २ विकेट लिए ।
त्यस्तै, ट्रेन्ट बोल्ट, सन्दिप शर्मा र युजभेन्द्र चाहलले समान १–१ विकेट लिए ।
क्वालिफायर २ अन्तर्गत खेल शुक्रवार राति हुनेछ ।
लेखक
