एजेन्सी । जर्मन महारथी बायर्न म्युनिखले बुडेसलिगाअन्तर्गत खेलमा होलस्टेन केइलमाथि फराकिलो जित निकालेको छ ।
सनिवार राति भएको खेलमा बलियो बायर्न म्युनिखले तुलनात्मक रुपमा कमजोर प्रतिद्वन्दी होलस्टेन केइलमाथि ६–१ को फराकिलो जित निकाल्यो ।
केइलको घरेलु मैदान होलस्टेन स्टाडिअन रंगशालामा भएको खेलमा भ्रमणकारी टोली म्युनिखलाई जिताउन ह्यारी केनले ह्याट्रिक हान्दा जमाल मुसियाला र माइकल ओस्लेले समान एक–एक गोल थपे ।
अर्को एक गोल भने घरेलु टोलीका निकोलाइ रेमबर्गले आत्मघाती उपहार दिए ।
यता, घरेलु टोली केइलका लागि भने अर्मिन जिगोभिकले सान्तोना गोल गरे ।
खेल सुरु भएको पहिलो मिनेटमै केनको पासमा मुसियालाले गोल गर्दै भ्रमणकारी टोलीलाई सुरुवाती अग्रता दिलायो ।
त्यसपछि सातौं मिनेटमा सर्जे जिनाब्रीको पासमा केनले गोल गर्दै म्युनिखलाई २–० ले अघि बढाए ।
यता, १३ औं निेटमा घरेलु टोलीका रेमबर्गले आत्मघाती गोल गर्दा म्युनिख ३–० ले अघि बढ्यो ।
पहिलो हाफको अन्त्यतिर ४३ औं मिनेटमा किंगस्ले कोम्यानको पासमा केनले व्यक्तिगत रुपमा दोस्रो गोल थप्दा म्युनिख ४–० ले अघि बढ्यो ।
त्यस्तै, दोस्रो हाफको ६५ औं मिनेटमा ओस्लेले गोल थप्दा जर्मन महारथी टोली ५–० ले अघि बढ्यो ।
तर, खेलको ८२ औं मिनेटमा अर्मिनले घरेलु टोलीका लागि एक गोल फर्काउँदा खेल ५–१ को अवस्थामा आयो ।
खेलको इन्जुरी समयको पहिलो मिनेटमा केनले पेनाल्टीमा गोल गर्दै व्यक्तिगत रुपमा ह्याट्रिक पूरा गर्दा म्युनिख ६–१ ले विजयी भयो ।
फराकिलो जितसंगै म्युनिखले तीन खेलबाट शतप्रतिशत जितलाई निरन्तरता दिँदा ९ अंक जोडेर लिग तालिकाको शीर्ष स्थानमा उक्लिएको छ ।
होलस्टेन केइलले भने अहिलेसम्म खेलेको तीनै खेलमा पराजय बेहोर्दा तालिकाको पुच्छारमा रहेको छ ।
लेखक
