एजेन्सी । नर्विच क्लब ब्रानमाथि जित निकाल्दै बार्सिलोना युरोपेली महिला फुटबलको शीर्ष प्रतियोगिता युईएफए महिला च्याम्पियन्स लिगको सेमिफाइनलमा प्रवेश गरेको छ ।
विहिवार राति क्वाटरफाइनलअन्तर्गत दोस्रो लेग खेलमा स्पेनिस क्लब बार्सिलोनाले ब्रानमाथि ३–१ समग्रमा ५–२ को जित निकाल्दै महिला च्याम्पियन्स लिगको सेमिफाइनलमा प्रवेश गरेको हो ।
बार्सिलोनाले त्यसअघि पहिलो लेग खेलमा पनि २–१ को जित रचेको थियो ।
बार्सिलोनाको घरेलु मैदान इस्टाडी जोहान क्रुयुफ रंगशालामा भएको खेलमा घरेलु टोलीलाई जित दिलाउन अैताना बोनमती, फ्रिदोलिना रोल्फो र प्याट्री गुइजारोले गोल गरिन् ।
पराजित टोलीका लागि टोमिन स्भेनधेइमले सान्तोना गोल फर्काइन् ।
पहिलो हाफको २४ औं मिनेटमा बोनमतीले गोल गर्दै घरेलु टोलीलाई सुरुवाती अग्रता दिलाइन् ।
त्यसपछि दोस्रो हाफको ५६ औं मिनेटमा रोल्फोले बार्सिलोनाका लागि गोल थप्दा खेल २–० ले अघि बढ्यो ।
तर, ७० औं मिनेटमा स्भेनधेइमले भ्रमणकारी टोलीका लागि गोल फर्काउँदा खेल २–१ को अवस्थामा फर्कियो ।
यता, खेलको अन्त्यतिर ८८ औं मिनेटमा बोनमतीको असिस्टमा गुइजारोले गोल गर्दा बार्सिलोना ३–१ ले विजयी भयो ।
यता, च्याम्पियन्स लिगअन्तर्गत बिहिवार राति नै भएको अर्को क्वाटरफाइनल खेलमा पेरिस सेन्ट जर्मन (पिएसजी) ले स्विडिस क्लब बिके ह्याच्केनमाथि ३–० समग्रमा ५–१ को जित हासिल गर्दै सेमिफाइनलमा स्थान पक्का गरेको छ ।
पिएसजीको घरेलु मैदान पेरिस देस प्रिन्सेस रंगशालामा भएको क्वाटरफाइनलअन्तर्गत दोस्रो खेलमा पहिलो हाफको २७ औं मिनेटमा ताबिथा चाविङ्गाको गोलमार्फत् घरेलु टोलीले सुरुवाती अग्रता लियो ।
त्यस्तै, दोस्रो हाफको ७० औं मिनेटमा कोर्बिन अल्बर्टले गोल थप्दा फ्रान्सेली क्लब २–० ले अघि बढ्यो ।
त्यसको चार मिनेटपछि नै मारी काटोटोले गोल थप्दा पिएसजी ३–० समग्रमा ५–१ ले विजयी भयो ।
त्यसअघि पहिलो लेग खेलमा पनि पिएसजीले बिके ह्याच्केनमाथि २–१ को जित निकालेको थियो ।
अब सेमिफाइनलमा बार्सिलोनाले इंग्लिस क्लब चेल्सीसंग खेल्ने पक्का हुँदा पिएसजीले ओलम्पिक लियोनेससंग खेल्ने भएको छ ।
लेखक
