एजेन्सी । स्पेनिस महारथी बार्सिलोना युरोपेली क्लब फुटबलको सर्वाधिक लोकप्रिय प्रतियोगिता युईएफए च्याम्पियन्स लिगको सेमिफाइनलमा प्रवेश गरेको छ ।
मंगलवार राति भएको क्वाटरफाइनलअन्तर्गत दोस्रो लेग खेलमा जर्मन क्लब बुरुसिया डर्टमण्डसंग ३–१ गोलअन्तरले पराजित भएपनि समग्रमा ५–३ को जितका साथ बार्सिलोना सेमिफाइनलमा प्रवेश गरेको हो ।
त्यसअघि क्वाटरफाइनलअन्तर्गत पहिलो लेग खेलमा ४ गोलको अग्रता कायम गर्नु नै बार्सिलोनाका लागि अन्तिम चारमा पुग्ने आधार बन्यो ।
जर्मन क्लबको घरेलु मैदान सिग्नल इडुना पार्क रंगशालामा भएको खेलमा क्याटलना क्लबमाथि जित निकालेर पनि घरेलु टोली सेमिफाइनल पुग्न सकेन ।
खेल सुरु भएको ११ औं मिनेटमा सेरहौ गुइरास्सेले पेनाल्टीमा गोल गर्दै घरेलु टोलीलाई १–० समग्रमा १–४ को अवस्थामा ल्याए ।
त्यसपछि दोस्रो हाफको ४९ औं मिनेटमा रामे बेनसेबैनीको पासमा गुइरास्सेले नै दास्रो गोल गर्दा जर्मन टोली २–० समग्रमा २–४ को स्थितिमा आयो ।
तर, ५४ औं मिनेटमा डर्टमण्डकै बेनसेबैनीले आत्मघाती गोल गर्न पुग्दा खेल २–१ समग्रमा २–५ को स्थितिमा पुग्यो ।
यता, ७६ औं मिनेटमा गुइरास्सेले व्यक्तिगत रुपमा ह्याट्रिक पूरा गर्दा डर्टमण्ड ३–१ समग्रमा ३–५ को अवस्थामा आयो ।
त्यसपछि खेलमा थप गोल भएन र हारका बाबजुद क्याटलान क्लब सेमिफाइनलमा प्रवेश गर्न सफल रह्यो ।
लेखक
