एजेन्सी । युईएफए युरोपा लिगअन्तर्गत प्लेअफको दोस्रो खेलमा स्पेनिस जायन्ट बार्सिलोनामाथि पुनरागमन जित रच्दै इंग्लिस क्लब म्यानचेस्टर युनाइटेड अघिल्लो चरण प्रवेश गरेको छ ।
विहिवार राति भएको हेभिवेट भिडन्तमा प्रिमियर लिग क्लब म्यानचेस्टर युनाइटेडले क्याटलान क्लब बार्सिलोनामाथि रोमाञ्चक २–१ को पुनरागमन जित निकालेको हो ।
ओल्डट्राफेडमा भएको खेलमा १८ औं मिनेटमा रोबर्ट लेवान्डोस्कीले पेनाल्टीमार्फत गोल गर्दै भ्रमणकारी टोलीलाई सुरुवाती अग्रता दिलाएको थियो ।
युनाइटेडका कप्तान ब्रुनो फर्नाडेजले बार्सिलोनाका खेलाडीलाई डिबक्सभित्र लडाएपछि बार्सिलोनाले पेनाल्टीको अवसर पाएको थियो ।
पहिलो हाफ १–० ले अघि रहेको बार्सिलोनाले दोस्रो हाफको ४७ औं मिनेटमा गोल बेहोर्दा खेल १–१ को बराबरीमा आयो । घरेलु टोलीका लागि फर्नाडेजको पासमा फ्रेडले गोल गर्दै खेल बराबरीमा ल्याएका थिए ।
त्यसपछि रोमाञ्चक खेलको ७३ औं मिनेटमा परिर्वतित खेलाडीका रुपमा मैदान प्रवेश गरेका एन्टोनीले गोल गर्दा युनाइटेड खेलमा २–१ ले अघि बढ्यो ।
प्रतिस्पर्धात्मक खेलमा थप गोल ननिस्केपछि युनाइटेडले खेल २–१ ले जित्दा प्ले अफमा समग्रमा ४–३ ले विजयी रह्यो ।
प्लेअफ अन्तर्गत पहिलो खेलमा युनाइटेड र बार्सिलोनाले २–२ को बराबरी खेलेको थियो ।
जितसंगै युनाइटेड प्रतियोगिताको अघिल्लो चरण प्रवेश गर्दा बार्सिलोना भने प्रतियोगिताबाट बाहिरिएको छ ।
लेखक
