एजेन्सी । बायर लेभरकुसेन युरोपेली क्लब फुटबलको दोस्रो श्रेणीको प्रतियोगिता युईएफए युरोपा लिगको सेमिफाइनलमा प्रवेश गरेको छ ।
विहिवार राति भएको क्वाटरफाइनअन्तर्गत दोस्रो लेग खेलमा इंग्लिस क्लब वेस्टह्याम युनाइटेडसंग १–१ को बराबरी खेल्दा समग्रमा ३–१ को जितका साथ जर्मन क्लब बायर लेभरकुसेन युरोपको सेमिफाइनलमा प्रवेश गरेको हो ।
त्यसअघि जर्मन क्लबकै घरेलु मैदानमा भएको क्वाटरफाइनलअन्तर्गत पहिलो लेग खेलमा लेभरकुसेन २–० ले विजयी भएको थियो ।
गयराति लन्डन क्लबको घरेलु मैदानमा भएको खेलमा घरेलु टोली वेस्टह्यामका लागि माइकल एन्टोनियो र भ्रमणकारी टोली लेभरकुसेनका लागि जेरेमी फ्रिमपोङ्गले गोल गरे ।
खेल सुरु भएको १३ औं मिनेटमा जारोर्ड बोवेनको पासमा एन्टोनियोले गोल गर्दै घरेलु टोलीलाई सुरुवाती अग्रता दिलाए ।
तर, दोस्रो हाफको अन्त्यतिर ८९ औं मिनेटमा जोसिप स्टानिसिकको पासमा फ्रिमपोङ्गले गोल फर्काउँदा खेल १–१ को बराबरीमा आयो ।
लेखक
