एजेन्सी । उपाधि होडमा रहेको लिभरपूलले इंग्लिस प्रिमियर लिगअन्तर्गत खेलमा बर्नलीमाथि सहज जित निकालेको छ ।
सनिवार राति भएको खेलमा बलियो लिभरपूलले तुलनात्मक रुपमा कमजोर प्रतिद्वन्दी बर्नलीमाथि ३–१ को सहज जित निकाल्यो ।
लिभरपूलको घरेलु मैदान एन्डफिल्ड रंगशालामा भएको खेलमा घरेलु टोलीका लागि डिएगो जोटा, लुइस डाइज र डार्विन नुनेजले गोल गर्दा भ्रमणकारी टोलीका लागि डारा ओशेआले एक गोल फर्काए ।
पहिलो हाफको ३१ औं मिनेटमा ट्रेन्ट अलेक्जान्डर आर्नोल्डको असिस्टमा जोटाले गोल गर्दै लिभरपूललाई सुरुवाती अग्रता दिलाए ।
तर, पहिलो हाफको अन्त्यतिर ४५ औं मिनेटमा जोश ब्राउनहिलको असिस्टमा डाराले भ्रमणकारी टोलीका लागि गोल फर्काउँदा खेल १–१ को बराबरीमा आयो ।
त्यसपछि दोस्रो हाफको ५२ औं मिनेटमा डाइजले मर्सिसाइड क्लबका लागि गोल थप्दा खेल २–१ को अवस्थामा अघि बढ्यो ।
यता, ७९ औं मिनेटमा हार्भे इलियोटको असिस्टमा नुनेजले गोल थप्दा रेड्सका रुपमा समेत चिनिने लिभरपूल ३–१ ले विजयी भयो ।
महत्वपूर्ण जितसंगै लिभरपूलले २४ खेलमा ५४ अंक जोड्दै लिग तालिकाको शीर्ष स्थानमा उक्लिन सफल भएको छ ।
लिभरपूलको तुलनामा एक खेल कम खेलेको साविक विजेता म्यानचेस्टर सिटीको ५२ अंक रहेको छ ।
यता, पराजित बर्नलीको भने २४ खेलमा १३ अंकमात्र रहेको छ । बर्नली तालिकाको १९ औं स्थानमा रहेको छ ।
गयराति नै भएको प्रिमियर लिगअन्तर्गत अन्य खेलहरुमा न्युक्यासल युनाइटेडले नटिङघम फोरेस्टमाथि ३–२ को प्रतिस्पर्धात्मक जित निकाल्दा उल्भ्स भने ब्रेन्टफोर्डसंग २–० ले स्तब्ध भएको छ ।
त्यस्तै, टोटनहम हटस्परले ब्राइटनलाई २–१ ले हराउँदा सेफिल्ड युनाइटेडले लुटन टाउनमाथि ३–१ को जित निकाल्न सफल रह्यो ।
लेखक
