एजेन्सी । श्रीलंकामा जारी एसीसी इमर्जिङ टिम्स कप एसिया कपअन्तर्गत समूह ‘ए’ को खेलमा बंगलादेश ‘ए’ ले ओमान ‘ए’ लाई सहजै पराजित गरेको छ ।
सनिवार भएको पहिलो खेलमा टेस्ट राष्ट्र बंगलादेश ‘ए’ ले एसोसियट राष्ट्र ओमान ‘ए’ लाई सहज रुपमा ८ विकेटले पराजित गरेको हो । ओमानमाथि महत्वपूर्ण जित हात पार्दै बंगलादेश ‘ए’ समूह ‘ए’ को तालिकामा महत्वपूर्ण २ अंक जोडेको छ ।
श्रीलंकास्थित सिंघालेसे स्पोर्ट्स क्लबमा भएको खेलमा १२७ रनको सामान्य विजयी लक्ष्य पछ्याएको बंगलादेशले १६.३ ओभरमा २ विकेट गुमाउँदै १३० रन बनाउँदै ८ विकेटको जित हात पार्यो ।
बंगलादेशका लागि तान्जिद हसनले ४९ बलमा ११ चौका र २ छक्का प्रहार गर्दै सर्वाधिक ६८ रनको अर्धशतकिय पारी खेल्दा मोहम्मद नासिम शेखले ४२ बलमा ७ चौका प्रहार गर्दै ४७ रन बनाएर अविजित रहे ।
त्यस्तै, जाकिर हसनले ६ बलमा २ चौका प्रहार गर्दै ११ रन जोड्दै अविजित रहँदा कप्तान मोहम्मद सैफ शुन्य रनमा पेविलियन फर्किए । बंगलादेशले अतिरिक्त रुपमा ४ रन जोड्यो ।
ओमानका लागि अक्विब इलियासले २.३ ओभर बलिङ गर्दै १७ रन दिएर २ विकेट लिए ।
त्यसअघि टस हारेर ओमान पहिला ब्याटिङमा उत्रिएको थियो । ओमानले ४६ ओभर खेल्नेक्रममा अलआउट हुँदै १२६ रन जोड्यो ।
ओमानका लागि आयान खानले ४७ बलमा २ चौका र १ छक्का प्रहार गर्दै २६ रन जोड्दा शुबो पलले ६४ बल खेल्दै १ चौका मद्दतमा २५ रन जोडे ।
त्यस्तै, शोयब खानले ३९ बलमा ३ चौका प्रहार गर्दै २३ रन जोडेर पेविलियन फर्किदा कश्यपकुमार प्रजापतिले ५० बलको सामाना गर्दा २ चौका प्रहार गर्दै २२ रन जोडेर आउट भए ।
यता, वासिम अली ६, अहमद फायज बुट ५, मोहम्मद बिलाल ४, विकेटकिपर अब्दुल रौफ २ रनमा आउट हुँदा जे विक्रम ओडेडारा २ रनमा अविजित रहे ।
ओमानका अन्य २ खेलाडी शुन्यमा आउट भए । ओमानले अतिरिक्त रुपमा ११ रन जोड्यो ।
ओमानी ब्याट्सम्यानमाथि पूर्णतया हावी रहेको बंगलादेशी बलरहरु मध्येमा तान्जिम हसन सकिबले ९ ओभर बलिङ गर्नेक्रममा २ मेडन राखेर मात्र १८ रन दिएर सर्वाधिक ४ विकेट हात पारे ।
त्यस्तै, रक्कीबुल हसनले १० ओभर बलिङ गर्दा २ मेडन राख्दै ३२ रन खर्चिएर २ विकेट लिँदा मह्मुदुल हसन जोयले ९ ओभर बलिङ गर्नेक्रममा १ मेडन राखेर २१ रन दिँदै २ विकेट लिए ।
यता, रिपोन मण्डल र माहेदी हसनले पनि समान १–१ विकेट हात पारे ।
लेखक
