एजेन्सी । दक्षिण अफ्रिकामा जारी आईसीसी महिला टि–२० विश्वकपमा बंगलादेशमाथि १० विकेटको जित हात पार्दै दक्षिण अफ्रिका सेमिफाइनल प्रवेश गरेको छ ।
मंगलवार राति भएको खेलमा बंगलादेशले दिएको ११४ रनको विजयी लक्ष्य आयोजक दक्षिण अफ्रिकाले १७.५ ओभरमा विना कुनै विकेट गुमाउँदै ११७ रन जोड्दै पूरा गर्यो ।
न्युल्याण्ड्स क्रिकेट ग्राउण्डमा भएको खेलमा घरेलु टोलीका लागि लौरा उलर्भातले ५६ बलमा ७ चौका र १ छक्का प्रहार गर्दै सर्वाधिक ६६ रन जोड्दै अविजित रहिन् ।
त्यस्तै, ताजमिन ब्रिट्सले ५१ बल खेल्दै ४ चौका मद्दतमा ५० रनको अर्धशतकिय रन जोड्दै अविजित हरिन् ।
लौरा र ताजमिनले ११६ रनको साझेदारी गरिन् । जारी विश्वकपमा यी दुई खेलाडीको साझेदारी अहिलेसम्मका लागि ठूलो साझेदारी समेत हो ।
त्यसअघि टस जितेर पहिला ब्याटिङमा उत्रिएको बंगलादेशले निर्धारित २० ओभरको खेलमा ६ विकेट गुमाउँदै ११३ रन बनाएको थियो ।
बंगलादेशका लागि कप्तान निगार सुल्तानाले ३४ बल खेल्दै २ चौका मद्दतमा ३० रन जोडेकी थिईन् । त्यस्तै, सोभाना मोस्तारी ३० बल खेल्दै २ चौका प्रहार गर्दै २७ रन जोड्दा विकेटकिपर शमिमा सुल्तानाले १६ बलको सामना गर्दै १ चौका मद्दतमा ११ रन बनाउँदै पेविलियन फर्किइन् ।
शोर्ना अक्टेरले पनि ११ बलमा १ चौका प्रहार गर्दै ११ रन जोड्दै आउट हुँदा फरगाना होक्यु ७ रनमा आउट भईन् । मुर्शिदा खातुन भने विना कुनै रन शुन्यमा पेविलियन फर्किइन् ।
निहिदा अक्टेर १५ तथा लता मोन्दल ५ रनमा अविजित रहिन् । बंगलादेशले ७ रन अतिरिक्त रुपमा पाएको थियो ।
घरेलु टोली साउथ अफ्रिकाका लागि मारिजन काप र आयाबोङगा खाकाले समान २–२ विकेट लिँदा नोनकुलुलेको माल्बा र शबनम इस्माइलले १–१ विकेट लिईन् ।
जितसंगै आयोजक अफ्रिकाले समूह ‘ए’ मा ४ खेलमा २ खेलमा जित र २ खेलमा हार बेहोर्दै ४ अंक जोडेको छ ।
न्युजिल्याण्ड र श्रीलंकाको पनि समान अंक रहेतापनि रन नेटका आधारमा दोस्रो स्थानमा रहँदै प्रतियोगिताको अन्तिम ४ सुरक्षित गरेको छ ।
सेमिफाइनलमा अफ्रिकाले इंग्ल्याण्डको सामना गर्ने भएको छ । पराजित बंगलादेशले भने समूहको ४ वटै खेलमा हार बेर्होदै प्रतियागिता अन्त्य गरेको छ ।
मंगलवार राति नै भएको पहिलो खेलमा इंग्ल्याण्डले पाकिस्तानमाथि ११४ रनको जित हात पारेको थियो ।
लेखक
