भक्तपुर । बराबरी उन्मुख खेलको अन्तिम समयमा सनसनीपूर्ण गोल गर्दै सातदोबाटो युवा क्लबले सहिद स्मरक ‘ए’ डिभिजन लिगमा फ्रेन्ड्स क्लबलाई पराजित गरेको छ ।
सनिवार भएको खेलमा सातदोबाटो युवा क्लबले फ्रेन्ड्स क्लबमाथि १–० को जित निकालेको हो ।
त्रिपुरेश्वेरस्थित दशरथ रंगशालामा भएको खेलमा निर्धारित ९० मिनेटको खेलपछि थपिएको ४ मिनेटको अतिरिक्त समयको तेस्रो मिनेटमा दिपक सिंह ठकुरी एकमात्र निर्णायक गोल गर्दा सातदोबाटोले जारी लिगमा शतप्रतिशत जित कायम गर्यो ।
जितसंगै ३ खेलमा ९ अंक जोडेको सातदोबाटो तालिकाको दोस्रो स्थानमा उक्लिएको छ । पराजित फ्रेन्ड्सको ३ खेलमा १ अंक छ ।
त्यसअघि सनिवार दिउँसो भएको खेलमा संकटा क्लबले विभागिय नेपाल पुलिस क्लबमाथि ३–० को सहज जित हात पार्यो ।
च्यासल रंगशालामा भएको खेलमा संकटाका लागि गणेश हमाल, रोशन पहरी र सुरजजंग ठकुरीले गोल गरेका हुन् ।
खेलको १२ औं मिनेटमा गणेशको गोलमार्फत संकटाले सुरुवाती अग्रता लिएको थियो । पहिलो हाफ १–० ले अघि रहेको संकटाले दोस्रो हाफको ८० औं मिनेटमा रोशनको गोलमार्फत अग्रता दोब्बर पार्यो ।
त्यसपछि सुरजले ८६ औं मिनेटमा गोल गरेपछि संकटाले खेल ३–० ले जित्यो । महत्वपूर्ण जितसंगै संकटाले ३ खेलमा ४ अंक जोड्दै लिग तालिकाको आठौं स्थानमा उक्लेको छ ।
संकटासंग पराजय बेहोरेको विभागिय क्लबले जारी लिगमा खेलेको ३ वटै खेलमा पराजय भोगेको छ ।
लेखक
