एजेन्सी । उपाधि होडमा रहेको आर्सनलले इंग्लिस प्रिमियर लिगअन्तर्गत खेलमा नटिङघम फोरेस्टमाथि जित निकालेको छ ।
मंगलवार राति भएको खेलमा बलियो आर्सनलले तुलनात्मक रुपमा कमजोर प्रतिद्वन्दी नटिङघम फोरेस्टमाथि २–१ को जित निकालेको हो ।
फोरेस्टको घरेलु मैदान द सिटी ग्राउण्ड रंगशालामा भएको खेलमा गर्नसका रुपमा समेत चिनिने आर्सनलको जितमा ग्राबियल जेसस र बुकायो साकाले गोल गरे ।
घरेलु टोलीका लागि भने टैव एओनीयीले एक गोल फर्काए ।
पहिलो हाफ गोलरहित बराबरीमा सकिएको खेलमा दोस्रो हाफको ६५ औं मिनेटमा ओलेक्जान्डर जिन्जेन्कोको पासमा जेससले गोल गर्दै भ्रमणकारी टोलीलाई सुरुवाती अग्रता दिलाए ।
त्यसपछि ७२ औं मिनेटमा जेससकै पासमा साकाले गोल थप्दै आर्सनललाई २–० ले अघि बढाए ।
यता, खेलको अन्त्यतिर ८९ औं मिनेटमा फोरेस्टका लागि गोन्जालो मोन्टियलको असिस्टमा एओनीयीले गोल फर्काउँदा खेल २–१ ले सकियो ।
जितसंगै आर्सनलले २२ प्रिमियर लिग खेलमा ४६ अंक जोड्दै लिग तालिकाको दोस्रो स्थानमा उक्लेको छ ।
पराजित फोरेस्टको भने समान २२ खेलमा २० अंकसहित तालिकाको १६ औं स्थानमा रहेको छ ।
प्रिमियर लिगअन्तर्गत नै गयराति भएको अन्य खेलहरुमा न्युक्यासल युनाइटेडले एस्टन भिल्लामाथि ३–१ को सहज जित दर्ता गर्दा क्रिस्टल प्यालेसले सेफिल्ड युनाइटेडमाथि ३–२ को प्रतिस्पर्धात्मक जित निकाल्यो ।
त्यस्तै, लुटन टाउनले सनसनी रुपमा ब्राइटनलाई ४–० को फराकिलो अन्तरले पराजित गर्दा फुलहम र एभर्टनले भने गोलरहित बराबरी खेलेका छन् ।
लेखक
