एजेन्सी । युरोपेली क्लब फुटबलको सर्वाधिक लोकप्रिय प्रतियोगिता युईएफए च्याम्पियन्स लिगअन्तर्गत खेलमा बायर लेभरकुसेनले फराकिलो जित निकालेको छ ।
विहिवार राति भएको लिग चरणको पहिलो खेलमा डच टोली फेयनोर्डमाथि जर्मन टोली बायर लेभरकुसेनले ४–० को फराकिलो जित निकालेको हो ।
फेयनोर्डको घरेलु मैदान स्टाडियन फैजेनोर्ड रंगशालामा भएको खेलमा भ्रमणकारी जर्मन टोलीलाई जिताउन फ्लोरियान विर्ट्जले दुई गोल गर्दा एलेक्स ग्रिमाल्डोले एक गोल थपे ।
अर्को एक गोल भने डच टोलीका टिमोन वेलेनरेउथरको आत्मघाती गोलमार्फत् लेभरकुसेनले प्राप्त गर्यो ।
खेल सुरु भएको पाँचौं मिनेटमा रोर्बट एन्डरिचको पासमा विर्ट्जले गोल गर्दै भ्रमणकारी टोलीलाई सुरुवाती अग्रता दिलायो ।
त्यसपछि ३० औं मिनेटमा ग्रिमाल्डोले गोल थप्दा लेभरकुसेन २–० ले अघि बढ्यो ।
त्यस्तै, ३६ औं मिनेटमा जेरेमी फ्रिमपोङको पासमा विर्ट्जले व्यक्तिगत रुपमा दोस्रो गोल थप्दा लेभरकुसेन ३–० ले अघि बढ्यो ।
यता, ४४ औं मिनेटमा घरेलु टोलीका टिमोनले आत्मघाती गोल गर्न पुग्दा लेभरकुसेन ४–० ले अघि बढ्यो ।
त्यसपछि दोस्रो हाफमा थप गोल निस्किएन ।
फराकिलो जितसंगै लेभरकुसेनले लिग तालिकामा तीन अंक जोडेको छ ।
लेखक
