भक्तपुर । बहुप्रतिक्षित फिफा विश्वकप एसियाली राष्ट्र कतारमा आइतवारदेखि सुरु हुदैछ । यस्तोमा ३२ टोलीले खेल्ने सर्वाधिक लोकप्रिय प्रतियोगिता ८ समूहमा विभाजन गरिएको छ ।
यसमध्ये समूह ‘ए’ को चर्चा गरौं । समूह ‘ए’ मा आयोजक कतारसंगै इक्वेडर, नेडरल्याण्ड र सेनेगल रहेका छन् ।
कतार
एसियाली राष्ट्र कतार आसन्न विश्वकपको आयोजक राष्ट्र हो । फुटबल जगतको प्रतिष्ठित प्रतियोगिताको लागि आयोजककै रुपमा सहि कतार पहिलोपल्ट सहभागी हुदैछ ।
कतार राष्ट्रिय टोलीलाई स्पेनिस फेलेक्स सान्चेजले हेरिरहेका छन् । उनले कतारमा लामो समयदेखि काम गरिरहेका थिए । पहिला कतारको युवा टोली हेरेका उनले सन् २०१७ बाट कतारको राष्ट्रिय टोली सम्हालेका थिए । उनको नेतृत्वमा कतारले सन् २०१९ को एएफसी एसियन कप जित्दा सन् २०२१ मा भएको कोन्काफ गोल्डकपमा सेमिफाइनलसम्मको यात्रा तय गरेको थियो ।
विश्वकपमा डेब्युको पर्खाइमा रहेको यो अरेबेली राष्ट्रका प्रमूख खेलाडीका रुपमा अक्रिम अफिफ रहेका छन् । कतारको लक्ष्य राम्रो खेल प्रदर्शन गर्नु नै हुनेछ । किनभने उसलाई गुमाउनु केहि छैन ।
नेडरल्याण्ड
सम्भवतः यस समूहको सबभन्दा बलियो टोली नेडरल्याण्ड नै हो । ८ वर्ष अगाडीको विश्वकपमा यो टोलीले फाइनलसम्मको यात्रा तय गरेको थियो ।
उपाधि भिडन्तमा स्पेनसंग पराजित भएको यस डच टोलीलाई लुईस भान गालले नेतृत्व गरेको थियो । अहिले पनि भान गाल नै डच टोलीको मूख्य प्रशिक्षकको जिम्मेवारीमा छन् ।
युरोपेली फुटबलका ख्याति प्राप्त खेलाडीहरुले भरिएको नेडरल्याण्डको मूख्य खेलाडीका रुपमा बार्सिलोनाका फरवार्ड मेम्फिस डीपे रहेका छन् । सम्भवत नेडरल्याण्ड समूह विजेताका रुपमा दोस्रो चरण प्रवेश गर्नेछ ।
इक्वेडर
दक्षिण अमेरिकी राष्ट्र इक्वेडर चौथौं पटक विश्वकपमा सहभागी हुदैछ । इक्वेडरलाई अन्डरडगका रुपमा लिइन्छ । यो टिमले कुनैपनि समय ठूला टिमहरुलाई समस्यामा पार्न सक्छ ।
इक्वेडरका मूख्य प्रशिक्षक गुस्ताभो अल्फारो हुन् भने प्रमूख खेलाडीमा इनर भ्यालेन्सिया रहेका छन् ।
सेनेगल
अफ्रिकी महादेशको फटबलमा एक चर्चित देश सेनेगल हो । सन् २००२ को विश्वकपमा यस राष्ट्रले क्वाटरफाइनलसम्मको यात्रा गरेको थियो ।
‘लायन्स अफ तेरङ्गाका उपनामले समेत परिचित यस राष्ट्रले पछिल्लो अफ्रिकी कप अफ नेसन्स जितेको थियो । युरोपेली टप क्लबहरुमा व्यवसायिक फुटबल खेलिरहेका चर्चित अनुहारले भरिएको राष्ट्रको मूख्य प्रशिक्षक अलिऔ सिसे रहेका छन् ।
सेनेगलको प्रमूख खेलाडीमा ब्रायन म्युनिखका स्ट्राइकर साडियो माने रहेका छन् ।
सम्भावित दोस्रो चरण पुग्ने दुई टोली
नेडरल्याण्ड र सेनेगल
लेखक
