भक्तपुर । कतारमा विश्वकपको समूह ‘एच’ मा विश्व फुटबलको लोकप्रिय खेलाडी क्रिस्चियानो रोनाल्डोको पोर्चुगलसंगै दक्षिण अमेरिकी राष्ट्र उरुग्वे, अफ्रिकी राष्ट्र घाना र एसियाली राष्ट्र दक्षिण कोरियारहेका छन् । जारी विश्वकपमा यो समूह कस्तो छ त ? चर्चा गरौं ।
पोर्चुगल
युरोपेली राष्ट्र पोर्चुगल भन्नासाथ क्रिस्चियानो रोनाल्डो नाम आइहाल्छ । पाँचपल्टका बेलेन डीओआर विजेता खेलाडीको पाँचौ विश्वकप हो यो ।
सम्भवतः कतार विश्वकप नै यी खेलाडीको अन्तिम विश्वकप हुनेछ । यस्तोमा पोर्चुगलले यहि संस्करणमा इतिहास रच्न सम्पूर्ण बल प्रयोग गर्ने निश्चित जस्तै छ । हालसालै म्यानचेस्टर युनाइटेड छोडेका रोनाल्डोको कप्तानीमा रहेको टिम पनि सन्तुलित र राम्रो रहेको छ ।
सन् १९६६ को विश्वकपमा डेब्यु गरेयता यो टोलीले ८ पल्ट विश्व फुटबलको सर्वोच्च प्रतियोगिता खेल्न लागेको हो । विश्वकपमा हालसम्मको ठूलो उपलब्धि सन् १९६६ मा तेस्रो स्थान हासिल गर्नु रहेको छ ।
युरोपेली फुटबलमा भने पोर्चुगलले सन् २०१६ मा युरोकप जितेको छ । त्यस्तै, २०१९ को यूईएफए नेसन्स लिग पनि जितेको छ । पछिल्लो फिफा वरियतामा ९ औं स्थानमा रहेको यस राष्ट्रलाई फर्नान्डो सान्तोषले हेरिरहेका छन् ।
उरुग्वे
फिफा विश्वकपको पहिलो संस्करणको आयोजक र विजेता राष्ट्र हो उरुग्वे । हालसम्म १४ संस्करणको विश्वकप खेल्ने तय भएको यो राष्ट्रले सन् १९३० र १९५० को विश्वकप जितेका थियो ।
यो राष्ट्रले कोपा अमेरिका १५ पटक जितेको छ । हाल फिफा वरियतामा १४ स्थानमा रहेको यस टिमको कोच डिएगो अलोन्सो रहेका छन् । उरुग्वे टिमको कप्तानी डीएगो गोडिनले गर्दैछन् ।
यस टिममा लुईस स्वारेज, इडिसन काभानीजस्ता अनुभवी खेलाडी रहँदा डार्विन नुनेज, रोनाल्ड अराउजो, जोजे गोमेज, म्याथिस ओलीभेरा, फाकुन्डो पिलिश्रीजस्ता युवा खेलाडीहरु रहेको छ ।
घाना
सन् २००६ को विश्वकपमा सनसनी मचाउँदै फिफा विश्वकपमा डेब्यु गरेको अफ्रिकी राष्ट्र हो घाना । त्यसयता यो राष्ट्र चारपल्ट विश्वकपमा छनोट भएको छ । सन् २०१० मा दक्षिण अफ्रिकामा भएको विश्वकपमा क्वाटरफाइनलसम्मको यात्रा तय गर्नु यो राष्ट्र अहिलेसम्मको ठूलो उपलब्धि हो । घानाले अफ्रिका कप अफ नेसन्स चारपल्ट जितेको छ । हाल फिफा वरियताको ६१ औं स्थानमा रहेको यो राष्ट्रलाई अन्डर दग टोली मानिएको छ । ब्ल्याक स्टार उपनामले चिनिने यो राष्ट्रलाई हाल ओटो आडोले प्रशिक्षण दिइरहेका छन् । आन्डे« इउ टोलीका कप्तान हुन् ।
दक्षिण कोरिया
टोटनहमका स्टार खेलाडी सन ह्युङ मिनको राष्ट्र हो दक्षिण कोरिया । एसियाको प्लेयर अफ द इएरबाट समेत समानित भएका सन यो टिमका मुख्य खेलाडी हुन् ।
कोरियालाई एसियाली फुटबलको बलियो टोली मानिन्छ । सन् १८५४ मा फिफा विश्वकपमा डेब्यु गरेको यो राष्ट्रले हालसम्म ११ पल्ट विश्वकप खेल्ने भएको छ ।
सन् २००२ मा आफ्नै भुमीमा भएको विश्वकपमा सेमीफाइनलसम्म पुग्नु कोरियाली टिमको हालसम्मको ठूलो उपलब्धि हो । गएको रसिया विश्वकपमा उपाधि दाबेदार टोली जर्मनीलाई हराएको यो राष्ट्रले यो पल्ट पनि राम्रो प्रदर्शन गर्ने अपेक्षा गर्न सकिन्छ ।
कोरियाले एसियन कप दुईपल्ट जितेको छ । पछिल्लो फिफा वरियतामा २८ औं स्थानमा रहेको यो राष्ट्रका मूख्य प्रशिक्षक पाउलो बेन्टो रहेका छन् ।
लेखक
