भक्तपुर । फिफा विश्वकपअन्तर्गत सनिवारबाट दोस्रो चरणका खेलहरु सुरु भएका छन् ।
उपाधि दाबेदार राष्ट्र अर्जेन्टिना र बलियो युरोपेली राष्ट्र नेडरल्याण्डले आ–आफ्ना खेलहरुमा जित निकाल्दै क्वाटरफाइनल प्रवेश गरेका छन् ।
लियोनल मेसीको कप्तानीमा रहेको राष्ट्रले एसियाली राष्ट्र अस्ट्रेलियालाई र भिर्जिल भान डाइकको कप्तानाीमा रहेको राष्ट्रले अमेरिकालाई पराजित गर्दै अन्तिम आठमा प्रवेश गरेको हो ।
दोस्रो चरणअन्तर्गत आइतवार पनि दुई खेलहरु हुँदैछन् । आजको पहिलो खेलमा साविक विजेता फ्रान्स र पोल्याण्ड भिड्दैछ भने दोस्रो खेलमा उपाधि दाबेदार मानिएको राष्ट्र इंग्ल्याण्ड र सेनेगलवीच प्रतिस्पर्धा हुँदैछ ।
पहिलो खेल राति पौने ९ बजे सुरु हुनेछ । भने दोस्रो खेल राति पौने १ बजे हुँदैछ ।
फ्रान्सविरुद्व पोल्याण्ड
साविक विजेतासमेत रहेको फ्रान्सले अर्को युरोपेली राष्ट्र पोल्याण्डसंग आज अल थुमामा रंगशालामा प्रतिस्पर्धा गर्दैछ ।
यसअघि यी दुई राष्ट्रबीच सन् १९८२ को विश्वकपमा आमनेसामने भएको थियो । तेस्रो स्थानको प्ले अफमा प्रतिस्पर्धा हुँदा पोल्याण्डले खेल ३–२ ले जितेको थियो ।
त्यसयता बलियो फ्रान्स पछिल्लो सात भेटमा पोल्याण्डसंग अपराजित रहेको छ । जसमा फ्रान्सले तीन खेल जितेको छ भने ४ खेल बराबरी खेलेको छ ।
फ्रान्सले सन् २००६ को विश्वकपमा इटालीसंग उपाधि भिडन्तमा पराजित भएपछि पछिल्लो सन् २०१८ को रसिया विश्वकप जितेको थियो ।
उपाधि रक्षा अभियानमा रहेको फ्रान्स यस पल्टको विश्वकपमा पनि बलियो रहेको छ । केलियन एम्बाप्पे, ओलिभर जिरुड, एन्टोनी ग्रिजमन, ओसमाने डेम्बेले जस्ता एक सेएक धारिलो अग्रपंक्ति फ्रान्सेली टिममा रहेका छन् ।
उसो त फ्रान्सको मिडफिल्ड र रक्षापंक्ति पनि उत्तिकै सशक्त रहेको छ । डिडियर डेसच्याम्पको नेतृत्वमा रहेको फ्रान्स पोल्याण्डविरुद्व सहज जित हात पार्दै अन्तिम आठमा स्थान बनाउने अभियानमा रहनेछ ।
यता पोल्याण्ड सनु १९८६ पछि पहिलो पटक कतार विश्वकपको नकआउट चरणमा पुगको हो । त्यसबेला अन्तिम १६ मा पोल्याण्ड ब्राजिलसंग ४–० ले पराजित भएको थियो ।
वर्तमान फुटबलका स्टार खेलाडी रोर्बटो लेवान्डोस्कीको कप्तानीमा रहेको पोल्याण्ड बलिया फ्रान्सविरुद्व सचेत रहेर खेल्नेछ । सकभर साविक विजेताविरुद्व अप्रत्यासित नतिजा लिकाल्ने उसको दाउ हुनेछ ।
इंग्ल्याण्डविरुद्व सेनेगल
सदाझै यो पल्ट पनि उपाधि दाबेदार राष्ट्रका रुपमा मानिएको इंग्ल्याण्ड र अफ्रिकी राष्ट्र सनेगलबीच आजको दोस्रो खेलमा प्रतिस्पर्धा हुनेछ । यो खेल अल ब्याट रंगशालामा हुँदैछ ।
यी दुई राष्ट्रहरु पहिलोपल्ट विश्वकपमा आमनेसामने हुन लागेका हुन् । इंग्ल्याण्ड अहिलेसम्म कहिल्यै पनि अफ्रिकी देशसंग पराजित भएको छैन ।
थ्री लायन्सका रुपमा चिनिने इंग्ल्याण्डले यसअघि अफ्रिकी राष्ट्रहरुसंग २० पल्ट खेलेको छ । जसमा इंग्ल्याण्डले १४ खेलमा जित हात पार्दा ६ खेल बराबरी खेलेको छ ।
उता सेनेगल भने युरोपेली राष्ट्रविरुद्व विश्वकपको अन्तिम चरणको ९ खेल खेल्दा ८ मा पराजित रहेको छ ।
समूह चरणमा अपराजित रहँदै दोस्रो चरण प्रवेश गरेको पूर्व विश्व विजेता इंग्ल्याण्ड आज सनेगलविरुद्व जित हात पार्दै क्वाटरफाइनल प्रवेश गर्ने ध्यानमा हुनेछ ।
उता अफ्रिकी महादेशको च्याम्पियन राष्ट्र बलियो इंग्ल्याण्डमाथि अप्रत्यासित जित निकाल्ने ध्यानमा हुनेछ ।
लेखक
