एजेन्सी । इंग्लिस फुटबलको लोकप्रिय प्रतियोगिता एफए कपअन्तर्गत तेस्रो चरणको खेलमा चेल्सीले प्रिस्टन नर्थ इन्डमाथि फराकिलो जित हासिल गरेको छ ।
सनिवार राति भएको खेलमा प्रिमियर लिग क्लब चेल्सीले च्याम्पियनसिप क्लब प्रिस्टन नर्थ इन्डमाथि ४–० को फराकिलो जित हासिल गरेको हो ।
चेल्सीको घरेलु मैदान स्टामफोर्ड ब्रिज रंगशालामा भएको खेलमा अरमान्डो ब्रोजा, थियागो सिल्भा, रहिम स्टर्लिङ र इन्जो फर्नान्डेजले गोल गरे ।
पहिलो हाफ गोल रहित बराबरीमा सकिएको खेलमा सबै गोल दोस्रो हाफमा सम्भब भयो ।
दोस्रो हाफको ५८ औं मिनेटमा मालो गुस्टोको पासमा ब्रोजाले गोल गर्दै चेल्सीलाई सुरुवाती अग्रता दिलायो ।
त्यसपछि ६६ औं मिनेटमा कोल पाल्मरको पासमा सिल्भाले गोल थप्दा चेल्सी २–० ले अघि बढ्यो ।
त्यसको ३ मिनेटपछि नै स्टर्लिङले गोल थप्दा घरेलु टोली ३–० को आरामदायी अग्रतातर्फ लम्कियो ।
यता, ८५ औं मिनेटमा फर्नान्डेजले गोल गर्दा चेल्सी ४–० को फराकिलो अन्तरले विजयी भयो ।
जितसंगै चेल्सी एफए कपको चौथौं चरणमा प्रवेश गर्दा पराजित प्रिस्टन भने प्रतियोगिताबाट बाहिरिएको छ ।
एफए कपअन्तर्गत गयराति नै भएको अन्य खेलहरुमा ब्राइटनले स्टोक सिटीमाथि ४–२ को जित निकाल्दा एस्टन भिल्लाले मिडल्सबर्गमाथि १–० को जित रच्यो ।
त्यस्तै, एएफसी बर्नमाउथले क्विन्स पार्क रेन्जर्समाथि ३–२ को प्रतिस्पर्धात्मक जित हासिल गर्दा सेफिल्ड युनाइटेडले गिलिङघममाथि ४–० को फराकिलो जित निकाल्यो ।
लेखक
