एजेन्सी । म्यानचेस्टर युनाइटेडले इंग्लिस प्रिमियर लिगअन्तर्गत खेलमा सेफिल्ड युनाइटेडमाथि जित निकालेको छ ।
बुधवार राति भएको खेलमा जारी सिजन उतारचढावपूर्ण लयबाट गुर्जिरहेको म्यानचेस्टर युनाइटेडले सेफिल्ड युनाइटेडमाथि ४–२ को जित निकालेको हो ।
युनाइटेडको घरेलु मैदान ओल्डट्राफेड रंगशालामा भएको खेलमा कप्तान ब्रुनो फर्नान्डेजले दुई गोल गर्दा ह्यारी मग्वायर र रासमुस होइलुन्डले एक–एक गोल गरे ।
भ्रमणकारी टोलीका लागि जेदिज बोग्ले र बिन ब्रेरेटन डाइजले एक–एक गोल गरे ।
खेलमा सुरुवाती अग्रता भने भ्रमणकारी टोलीले ३५ औं मिनेटमा बाग्लेको गोलमार्फत् लियो ।
तर, ४२ औं मिनेटमा आलेहान्ड्रो ग्रानाचोको पासमा मग्वायरले गोल गर्दै खेललाई १–१ को बराबरीमा ल्याए ।
त्यसपछि फेरी दोस्रो हाफको ५० औं मिनेटमा बिन ओसबर्नको पासमा डाइजले गोल गर्दै सेफिल्डलाई २–१ ले अघि बढाए ।
तर, ६१ औं मिनेटमा फर्नान्डेजले पेनाल्टीमा गोल गर्दै खेलाई २–२ को बराबरीमा ल्याए ।
त्यसपछि ८१ औं मिनेटमा कोबी माइनोको पासमा फर्नान्डेजले व्यक्तिगत रुपमा दोस्रो गोल थप्दा युनाइटेड ३–२ ले अघि बढ्यो ।
त्यसको चार मिनेटपछि नै फर्नान्डेजको पासमा होइलुन्डले गोल गर्दा युनाइटेड ४–२ ले विजयी भयो ।
महत्वपूर्ण जितसंगै युनाइटेडले ३३ खेलमा ५३ अंक जोड्दै लिग तालिकाको छैटौं स्थानमा उक्लेको छ ।
पराजित सेफिल्डको भने समान ३४ खेलबाट १६ अंकसहित तालिकाको पुच्छारमा रहेको छ ।
लेखक
