एजेन्सी । म्यानचेस्टर सिटी प्रिमियर लिगमा क्रिस्टल प्यालेससंग बराबरीमा रोकिएको छ ।
सनिवार राति भएको खेलमा साविक विजेता म्यानचेस्टर सिटी तुलनात्मक रुपमा कमजोर प्रतिद्वन्दी क्रिस्टल प्यालेससंग २–२ को बराबरीमा रोकिएको हो ।
प्यालेसको घरेलु मैदान सेलहुर्स्ट पार्क रंगशालामा भएको खेलमा भ्रमणकारी टोली सिटी दुई पटक खेलमा पछि परेर बराबरीसम्म आयो ।
खेल सुरु भएको चौथौं मिनेटमा विल हगेहेसको पासमा ड्यानियल मुनोजले गोल गर्दै घरेलु टोलीलाई १–० ले अघि बढाए ।
त्यसपछि खेलको ३० औं मिनेटमा म्याथ्युस नुनेसको पासमा इर्लिङ हालान्डले भ्रमणकारी टोलीका लागि गोल फर्काउँदा खेल १–१ को बराबरीमा आयो ।
यता, दोस्रो हाफको ५६ औं मिनेटमा विल हगहेसकै पासमा म्याक्सेन्स लाक्रोक्सले गोल गर्दा पुनः प्यालेस २–१ ले अघि बढ्यो ।
तर, ६८ औं मिनेटमा बेनार्डो सिल्भाको पासमा रिको लिविसले गोल फर्काउँदा सिटी २–२ को बराबरीमा आयो ।
त्यसपछि खेलको ८४ औं मिनेटमा लिविसले दोहोरो पँहेलोसंगै रातो कार्ड खाँदा सिटी १० खेलाडीमा समेतियो ।
बराबरीसंगै सिटीले १५ खेलबाट २७ अंक जोडेर लिग तालिकाको चौथौं स्थानमा रहेको छ ।
प्यालेसको पनि समान १५ खेलमा १३ अंकसहित तालिकाको १६ औं स्थानमा उक्लिएको छ ।
प्रिमियर लिगअन्तर्गत नै अन्य खेलहरुमा एस्टन भिल्लाले साउथह्याम्टनलाई १–० ले हराउँदा ब्रेन्टफोर्डले पनि न्युक्यासल युनाइटेडलाई ४–२ ले पराजित गरेको छ ।
लेखक
