एजेन्सी । म्यानचेस्टर युनाइटेडले प्रिमियर लिगमा ब्रेन्टफोर्डमाथि जित निकालेको छ ।
सनिवार राति भएको खेलमा म्यानचेस्टर युनाइटेडले ब्रेन्टफोर्डमाथि एक गोलले पछि परेको स्थितिलाई उल्ट्याउँदै २–१ को जित निकालेको हो ।
युनाइटेडको घरेलु मैदान ओल्ड ट्राफेड रंगशालामा भएको खेलमा घरेलु टोलीको जितमा आलेहान्ड्रो ग्रानाचो र रासमुस होइलुन्डले गोल गरे ।
पराजित भ्रमणकारी टोलीका लागि भने इथान पिननकले गोल गरे ।
पहिलो हाफको इन्जुरी समयको पाँचौं मिनेटमा मिक्केल डाम्सगार्डको पासमा पिननकले गोल गर्दै भ्रमणकारी टोलीलाई सुरुवाती अग्रता दिलाए ।
तर, दोस्रो हाफको सुरुवाती समयतिर ४७ औं मिनेटमा मार्कुस रासफोर्डको पासमा ग्रानाचोले गोल फर्काउँदा खेल १–१ को बराबरीमा आयो ।
यता, लगातार जसो खेलमा आक्रमण बुनिरहेको युनाइटेडले ६२ औं मिनेटमा ब्रुनो फर्नान्डेजको पासमा होइलुन्डले गोल थप्दा २–१ ले अघि बढ्यो ।
त्यसपछि खेलमा थप गोल निस्किएन र युनाइटेड २–१ ले विजयी भयो ।
महत्वपूर्ण जितसंगै युनाइटेडले ८ खेलबाट ११ अंक जोड्दै लिग तालिकाको १० औं स्थानमा उक्लिएको छ ।
पराजित ब्रेन्टफोर्डले समान ८ खेलमा १० अंकसहित तालिकाको १२ औं स्थानमा झरेको छ ।
सनिवार राति नै भएको अन्य प्रिमियर लिग खेलमा टोटनहम हटस्परले वेस्टह्याम युनाइटेडलाई ४–१ ले पराजित गर्दा फुलहम भने एस्टन भिल्लासंग ३–१ ले पराजित भयो ।
त्यस्तै, लेस्टर सिटीले साउथह्याम्टनलाई ३–२ ले पराजित गर्दा न्युक्यासल युनाइटेड भने ब्राइटनसंग १–० ले स्तब्ध बन्यो ।
यता, एभर्टनले भने आईपिएसविच टाउनलाई २–० ले पराजित गर्यो ।
लेखक
