एजेन्सी । इंग्लिस प्रिमियर लिगमा लिभरपूलले फुलहममाथि सहज जित निकालेको छ ।
आईतवार राति भएको खेलमा उपाधि दौडमा रहेको लिभरपूलले फुलहममाथि ३–१ को सहज जित निकालेको हो ।
फुलहमको घरेलु मैदान कार्भेन सिटी रंगशालामा भएको खेलमा भ्रमणकारी टोली लिभरपूलको जितमा ट्रेन्ट अलेक्जान्डर आर्नोल्ड, रायन ग्भेनबेर्च र डियगो जोटाले गोल गरे ।
घरेलु टोलीका लागि टिमोठी कास्टाग्नेले एक गोल फर्काए ।
पहिलो हाफको ३२ औं मिनेटमा आर्नोल्डले गोल गर्दै भ्रमणकारी टोलीलाई सुरुवाती अग्रता दिलाए ।
तर, पहिलो हाफको इन्जुरी समयको दोस्रो मिनेटमा टिमोठीले गोल फर्काउँदा खेल १–१ को बराबरीमा आयो ।
त्यस्तै, दोस्रो हाफको ५३ औं मिनेटमा हार्भे इलियोटको पासमा रायनले गोल थप्दा मर्सिसाइड क्लब २–१ ले अघि बढ्यो ।
यता, कोडी गाक्पोको पासमा ७२ औं मिनेटमा जोटाले गोल थप्दा रेड्स ३–१ ले विजयी भयो ।
सहज जितसंगै लिभरपूलले ३३ खेलबाट ७४ अंक जोडेको ।
शीर्ष स्थानमा रहेको आर्सनलसंग अंक बराबरी भएतापनि गोलअन्तरका आधारमा लिभरपूल तालिकाको दोस्रो स्थानमा रहेको छ ।
पराजित फुलहमको भने ३४ खेलबाट ४२ अंकसहित तालिकाको १२ औं स्थानमा रहेको छ ।
लेखक
