एजेन्सी । प्रिमियर लिगमा म्यानचेस्टर युनाइटेड टोटनहम हटस्परसंग हारेको छ ।
आईतवार राति भएको खेलमा म्यानचेस्टर युनाइटेड टोटनहम हटस्परसंग ३–० ले हारेको हो ।
युनाइटेडको घरेलु मैदान ओल्ड ट्राफेड रंगशालामा भएको खेलमा १० खेलाडीमा समेतिएको घरेलु टोलीलाई हराउन भ्रमणकारी टोलीका लागि ब्रेनान जोनसन, डिजेन कुलुसेभस्की र डोमिनिक सालान्केले गोल गरे ।
खेल सुरु भएको तेस्रो मिनेटमै मिकी भान डि भेनको असिस्टमा जोनसनले गोल गर्दै टोटनहमलाई सुरुवाती अग्रता दिलाए ।
त्यसपछि खेलको ४२ औं मिनेटमा युनाइटेडका कप्तान ब्रुनो फर्नान्डेजले रातो कार्ड खाँदै मैदानबाट बाहिरिए ।
जसको भरपुर फाइदा भ्रमणकारी टोलीले लियो ।
दोस्रो हाफको ४७ औं मिनेटमा कुलुसेभस्कीले गोल गर्दै स्पर्सका रुपमा समेत चिनिने टोटनहमलाई २–० ले अघि बढाए ।
यता, ७७ औं मिनेटमा पापे माटर सरको पासमा सोलान्केले गोल थप्दा टोटनहम ३–० ले विजयी भयो ।
सहज जितसंगै टोटनहमले ६ खेलबाट १० अंक जोड्दै लिग तालिकाको आठौं स्थानमा उक्लिएको छ ।
पराजित युनाइटेडको भने समान ६ खेलमा मात्र ७ अंकसहित तालिकाको १२ औं स्थानमा झरेको छ ।
लेखक
