एजेन्सी । इंग्लिस प्रिमियर लिगअन्तर्गत साताको हेभिवेट भिडन्तमा लिभरपूल र म्यानचेस्टर सिटीले बराबरी खेलेको छ ।
आईतवार राति भएको उपाधि होडमा रहेको दुई टोलीबीचको खेलमा लिभरपूल र म्यानचेस्टर सिटीले १–१ को बराबरी खेलेको हो ।
लिभरपूलको घरेलु मैदान एन्फिल्ड रंगशालामा भएको खेलमा साविक विजेता सिटीका लागि जोन्स स्टोन र घरेलु टोलीका लागि एलेक्स म्याक अलिस्टारले गोल गरे ।
खेलको २३ औं मिनेटमा केभिन डिब्रुएनाको पासमा जोन स्टोनले गोल गर्दै भ्रमणकारी टोलीलाई सुरुवाती अग्रता दिलाए ।
यता, दोस्रो हाफको ५० औं मिनेटमा पेनाल्टीमा म्याक अलिस्टारले लिभरपूलका लागि गोल फर्काउँदा खेल १–१ को बराबरीमा आयो ।
प्रतिस्पर्धात्मक खेलमा त्यसपछि थप गोल भएन र खेल बराबरीमा सकियो ।
बराबरीसंगै दुबै टोलीले अंक बाँडेका छन् ।
घरेलु टोली लिभरपूलले जारी लिगमा २८ खेलबाट ६४ अंक जोड्दै लिग तालिकाको दोस्रो स्थानमा उक्लिएको छ ।
शीर्ष स्थानमा रहेको आर्सनलसंग समान अंक भएतापनि गोलअन्तरका आधारमा लिभरपूल दोस्रो स्थानमा रहेको छ ।
यता, सिटीको भने समान २८ खेलबाट ६३ अंकका साथ तालिकाको तेस्रो स्थानमा रहेको छ ।
लेखक
