भक्तपुर । विश्व खेलकुद महाकुम्भ पेरिस ओलम्पिक समापन भएको छ ।
आईतवार राति बास्केटबलको फाइनल खेल सकेसंगै फ्रान्सको राजधानी पेरिसमा जारी पेरिस ओलम्पिक समापन भएको हो ।
बास्केटबलको फाइनल खेलमा संयुक्त राज्य अमेरिकाले घरेलु टोली फ्रान्सलाई हराउँदै स्वर्ण पदक जित्न सफल भयो ।
योसंगै पदक तालिकामा पनि अमेरिका शीर्ष स्थानमा उक्लिन सफल भयो ।
ओलम्पिकको शीर्ष स्थानका लागि अमेरिका र चीनबीच कडा प्रतिस्पर्धा चलेको थियो ।
अमेरिकाले शीर्ष स्थान हासिल गर्नेक्रममा ४० स्वर्ण, ४४ रजत र ४२ कांस्यसहित कुल १२६ पदक जित्न सफल भयो ।
यता, ४० स्वर्ण, २७ रजत र २४ कांस्य पदकसहित कुल ९१ पदक जितेर चीन दोस्रो स्थानमा रह्यो ।
तालिकाको तेस्रो स्थानमा भने जापान रह्यो ।
जापानले २० स्वर्ण, १२ रजत र १३ कांस्यसहित कुल ४५ पदक जित्दा चौथौं स्थानमा रहेको अष्ट्रेलियाले १८ स्वर्ण, १९ रजत र १६ कांस्य पदक सहित कुल ५३ पदक जित्न सफल भयो ।
त्यस्तै, १६ स्वर्ण, २६ रजत र २२ कांस्यसहित कुल ६४ पदक जितेको घरेलु टोली फ्रान्सले पाँचौं स्थान कब्जा जमाउँदा १५ स्वर्णसहित ७ रजत र १२ कांस्य गरी कुल ३४ पदक जितेको नेडरल्याण्ड्स तालिकाको छैटौं स्थानमा रह्यो ।
सातौं स्थानमा भने १४ स्वर्ण, २२ रजत र २९ कांस्य पदकसहित बेलायत रहँदा दक्षिण कोरियाले १३ स्वर्ण, ९ रजत र १० कांस्य गरि कुल ३२ पदक जितेर ८ औं स्थानमा रहन सफल भयो ।
यता, १२ स्वर्ण, १३ रजत र १५ कांस्य गरि कुल ४० पदक जितेको इटालीले ९ औं स्थान हासिल गर्दा जर्मनीले १२ स्वर्ण, १३ रजत र ८ कांस्य गरि कुल ३३ पदक जित्दै तालिकाको १० औं स्थान पक्का गर्यो ।
यसपल्टको ओलम्पिकमा रुसलाई भने सहभागी गराइएन ।
जुलाइ २६ तारिखदेखि सुरु भएको महाकुम्भ अगस्ट ११ सम्मको समापनमा आइपुग्दा कुल ८४ राष्ट्रले पदक तालिकामा स्थान बनाउँदा ६२ राष्ट्रले स्वर्ण पदक जित्न सफल भयो ।
दक्षिण एसियाली राष्ट्रतर्फ भने पाकिस्तान र भारतले मात्रै पदकको खाता खोल्न सक्यो ।
पाकिस्तानले एक स्वर्ण पदक जित्दै तालिकाको ६२ औं स्थानमा रहन सफल भयो ।
यता, भारतले भने १ रजत र ५ कांस्यसहित कुल ६ पदक जित्दै ७१ औं स्थानमा रह्यो ।
दक्षिण एसियामा नेपालसहित भुटान, श्रीलंका, माल्दिभ्स र बंगलादेश पदकको खाता नै खोल्न सकेनन् ।
३२ खेलको ३२९ विधा रहेको ओलम्पिकमा २०६ राष्ट्रका १० हजार ७ सय १४ खेलाडीले सहभागिता जनाएको थियो ।
लेखक
