एजेन्सी । पोर्चुगिच भेट्रान डिफेन्डर पेपेले संन्यासको घोषणा गरेका छन् ।
उनले विहिवार राति सामाजिक सञ्जालमार्फत् सबैखाले फुटबलबाट संन्यासको घोषणा गरेका हुन् ।
४१ वर्षिय डिफेन्डरले पोर्चुगलका लागि १४१ खेलमा ८ गोल गरेका छन् ।
उनले सन् २००७ मा पोर्चुगल राष्ट्रिय फुटबल टोलीका लागि डेब्यु गरेयता ४ फिफा विश्वकप, ५ युरो कप र ३ युईएफए नेसन्स कप खेलेका छन् ।
पोर्चुगलले सन् २०१६ मा युरो कप, २०१९ मा नेसन्स कप जित्दा टोलीका महत्वपूर्ण सदस्य थिए ।
उनले अन्तिमपटक भर्खरै जर्मनीमा सम्पन्न युरोकपमा आफ्नो राष्ट्रका लागि खेलेका थिए ।
यसक्रममा उनले युरो कप खेल्ने हालसम्मका पाका खेलाडीको क्रीतिमान पनि बनाए ।
लेजेण्डरी डिफेन्डरले व्यवसायिक रुपमा ५३५ खेल खेल्दा ३५ गोलसमेत गरेका छन् ।
पेपेले आफ्नो व्यवसायिक करियर सन् २००१ मा पोर्चुगिच क्लब मारिटिमो बी बाट सुरुवात गरेका थिए ।
उनले बी टिमका लागि १४ खेलमा १ गोल गरे ।
त्यसपछि सन् २००२ देखि ४ सम्म ए टिमका लागि ६३ खेल खेले जसमा ३ गोलसमेत गरे ।
सन् २००४ मा पेपे मारिटिमोबाट पोर्चुगिच महारथी क्लब पोर्टो पुगे ।
पार्टोमा तीन सिजन रहँदा ६४ खेल खेल्नुका साथै ६ गोल पनि गरे ।
सन् २००७ मा पेपे पोर्टोबाट स्पेनिस महारथी रियल मड्रिड पुगे ।
उनले १० वर्ष मड्रिडमा विताउने क्रममा २२९ खेल खेल्दै १३ गोलसमेत गरे ।
यता, २०१७ मा मड्रिडको बसाँई टुंग्याउँदै टर्किस क्लब बेसिक्टास पुगे ।
जहाँ एक सिजन खेल्नेक्रममा ३३ खेलमा ५ गोल गरे ।
सन् २०१९ मा आफ्नै पुरानो क्लब पार्टो पुगेका उनले त्यसयता ३ सिजनमा १३२ खेल खेल्दै ७ गोल समेत गरे ।
पेपेले क्लब फुटबलमा मड्रिडबाट ३ ला लिगा उपाधि, ३ युईएफए च्याम्पियन्स लिगको उपाधि, २ फिफा क्लब विश्वकप र २ कोपा डेल रेको उपाधि जितेका छन् ।
त्यस्तै, पोर्टोबाट ४ प्रिमिराा लिगा (पोर्चुगिच शीर्ष घरेलु लिग) र ३ ताका डि पोर्चुगलको उपाधि जितेका छन् ।
लेखक
