एजेन्सी । अफगानिस्तानले आईसीसी टि–२० विश्वकपअन्तर्गत खेलमा पपुवा न्युगिनी (पिएनजी) माथि सहज जित हासिल गर्दै सुपर ८ मा प्रवेश गरेको छ ।
शुक्रवार विहान भएको खेलमा अफगानिस्तानले पिएनजीमाथि ७ विकेटको सहज जित हासिल गर्दै सुपर ८ मा प्रवेश गरेको हो ।
अफगानिस्तानले समूह ‘सी’ बाट ३ खेल खेल्नेक्रममा शतप्रतिशत जित निकाल्दै ६ अंक जोडेर तालिकाको शीर्ष स्थानमा उक्लियो ।
यो समूहबाट यसअघि नै वेस्ट इन्डिजले अघिल्लो चरण स्थान सुरक्षित गरिसकेको छ ।
यहि समूहमा रहेको बलियो न्युजिल्याण्ड भने समूह चरणबाटै बाहिरएको छ ।
पिएनजीले भने समूह चरणका ३ खेल खेल्दा सबैमा हार बेहोरेको छ ।
वेस्ट इन्डिजस्थित ब्रायन लारा क्रिकेट एकेडेमी रंगशालामा भएको खेलमा ९६ रनको विजयी लक्ष्यका साथ जवाफी ब्याटिङमा उत्रिएको अफगानिस्तानले १५.१ ओभरमा ३ विकेट गुमाउँदै १०१ रन जोड्यो ।
अफगानिस्तानको जितमा गुलबदिन नाइबले ३६ बलमा ४ चौका र २ छक्का प्रहार गर्दै ४९ रन जोडेर अविजित रहँदा मोहम्मद नाबीले २३ बल खेल्नेक्रममा १ चौका मद्दतमा १६ रन जोडेर अविजित रहे ।
त्यस्तै, अज्मतुल्लाह ओमारजायीले १८ बलमा १ चौका प्रहार गर्दै १३ रन जोडेर आउट हुँदा ओपनर ब्याट्सम्यान तथा विकेटकिपर रहमानुल्लाह गुरबाजले ७ बल खेल्दै १ चौका र १ छक्का प्रहार गर्दै ११ रन जोडेर पेविलियन फर्किए ।
अर्का ओपनर इब्राहिम जडरान भने शुन्य रनमा पेविलियन फर्किए ।
अफगानिस्तानले अतिरिक्त रुपमा १२ रन जोड्यो ।
पिएनजीका लागि अलै नाओ, चाद सोपेर र नोर्मन भानुआले समान १–१ विकेट लिए ।
त्यसअघि टस हारेर पहिला ब्याटिङमा उत्रिएको पिएनजीले १९.५ ओभरमा अलआउट हुँदै ९५ रन जोड्यो ।
पिएनजीका लागि विकेटकिपर किप्लिन डोरिगाले ३२ बलमा २ चौका प्रहार गर्दै २७ रन जोडेर पेविलियन फर्किदा अलै नाओले १९ बल खेल्दै २ चौका प्रहार गरेर १३ रन जोड्दै आउट भए ।
त्यस्तै, ओपनर ब्याट्सम्यान टोनी उराले १८ बलमा १ चौका मद्दतमा ११ रन जोडेर आउट हुँदा चाद सोपेर ९, कप्तान अस्सद भाला ३, सेमो कामेआ २, हिरी हिरी १ रनमा पेविलियन फर्किए ।
जोन कारिको ४ रनमा अविजित रहँदा अन्य ३ पिएनजीका खेलाडी शुन्य रनमा आउट भए ।
पिएनजीले अतिरिक्त रुपमा २५ रन जोड्यो ।
पिएनजीलाई अलआउट गर्न फजलहक फारुकीले ३ विकेट लिँदा नविन उल हकले २ र नुर अहमदले १ विकेट लिए ।
पिएनजीका अन्य ४ विकेट रनआउटमार्फत् अफगानिस्तानले प्राप्त गर्यो ।
लेखक
