भक्तपुर । पाकिस्तानविरुद्धको टेस्ट सिरिज इंग्ल्याण्डले एक खेल अगावै जितेको छ ।
पाकिस्तानस्थित मुल्टान क्रिकेट रंगशालामा भएको तीन खेलको टेस्ट सिरिजको दोस्रो खेलमा भ्रमणकारी टोलीले पाकिस्तानमाथि २६ रनको जित हात पारेको हो । जितेसँगै इंग्ल्याण्डले सिरिज २–० ले जितेको छ ।
सोमबार इंग्ल्याण्डले दिएको ३ सय ५५ रनको विजयी लक्ष्य पछ्याएको पाकिस्तान ३ सय २८ रनमा समेटिएसंगै घरेलु टोली पराजित भएको हो ।
पाकिस्तानको लागि साउद शकिलले सर्वाधिक ९४ रनको अर्धशतकीय योगदान गरे । त्यस्तै, इमाम उल हकले ६० रनको अर्धशतकीय रन जोड्दा मोहम्मद नवाज र अब्दुल्लाह शाफिक्युले समान ४५–४५ रन बनाए । यता, मोहम्मद रिजवानले ३० तथा आगा सलमान २० रन जोड्दै अविजित रहे ।
थ्री लायन्सका रुपमा समेत परिचित इंग्ल्याण्डका लागि मार्क उडले ४ विकेट लिए । त्यस्तै, ओली रोविन्सन र जेम्स एन्डरसनले समान २–२ विकेट हात पारे । यता, ज्याक लिज र जोय रुटले पनि समान १–१ विकेट लिए ।
यसअघि इंग्ल्याण्डले टस जितेर पहिला ब्याटिङ गर्ने निर्णय गर्दै २ सय ८१ रन जोडेको थियो । इंग्लिस टोलीका लागि बेन डुकेट र ओली पोप अर्धशतक प्रहार गरेका थिए । डुकेटले ६३ रन जोड्दा पोपले ६० रनको योगदान गरेका थिए । त्यस्तै, मार्क उड अविजित रहँदै ३६ रन जोड्दा विल ज्याक्सले ३१ रन बनाएका थिए ।
यता, ज्याक क्रोली भने १९ रनमा आउट भएका थिए । घरेलु टोलीका लागि अबरार अहम्मदले ७ तथा जायद मोहम्मदले ३ विकेट लिएका थिए ।
तीन खेलको टेस्ट सिरिजको तेस्रो खेल आगामी सनिवार हुनेछ ।
लेखक
