एजेन्सी । आईसीसी महिला टि–२० विश्वकपमा पाकिस्तानमाथि जित हात पार्दै भारतले प्रतियोगितामा विजयी सुरुवात गरेको छ ।
आइतवार भएको समूह ‘बी’ को खेलमा चिरपरिचत प्रतिद्वन्दी पाकिस्तानलाई भारतले ७ विकेटको जित हात पारेको हो ।
दक्षिण अफ्रिकास्थित न्युल्याण्ड्स क्रिकेट मैदानमा भएको खेलमा १५० रनको विजयी लक्ष्य पछ्याएको भारतिय महिला टोलीले १९ ओभरमा ३ विकेट गुमाउँदै १५१ रन जोड्दै लक्ष्य पूरा गर्यो ।
भारतका लागि जेमिमाह रोड्रिगियोसले ३८ बल खेल्दै ८ चौकाको मद्दतमा अविजित रहँदै सर्वाधिक ५३ रन बनाइन् । त्यस्तै, साफाली बर्माले २५ बलमा ४ चौका प्रहार गर्दै ३३ रनको योगदान गरिन् ।
विकेटकिपर समेत रहेकी रिचा घोष २० बलमा ५ चौकाको मद्दतमा ३१ रनमा अविजित रहिन् । त्यस्तै, यस्तिका भातिया १७, कप्तान हर्मनप्रित कौरले १६ रन जोडिन् ।
पाकिस्तानका लागि नाशरा सन्धुले २ विकेट लिँदा सदिया इकवालले १ विकेट लिईन् ।
त्यसअघि टस जितेर पहिला ब्याटिङमा उत्रिएको पाकिस्तानी महिला टोलीले निर्धारित २० ओभरको खेलमा ४ विकेटको क्षतिमा १४९ रन जोडेको थियो ।
पाकिस्तानका लागि कप्तान बिसमह मरुफले ५५ बलमा ७ चौका प्रहार गर्दै अविजित रहँदै सर्वाधिक ६८ रन जोडेकी थिईन् । त्यस्तै, आयशा नासिमले पनि २५ बल खेल्दै २ चौका र २ छक्काको मद्दतमा अविजित ४३ रन जोडेकी थिईन् ।
विकेटकिपर मुनिबा अलिले १२ रन जोड्दा सिद्रा अमेन ११ रनमा आउट भईन् । जाबेरिया खान ८ रनमा पेविलियन फर्किदा निदा दर शुन्यमा आउट भइन् ।
भारतका लागि राधा यादवले २ विकेट लिँदा दिप्ती शर्मा र पुजा बसट्राकरले १–१ विकेट लिईन् ।
जितसंगै भारतले समूह ‘बी’ मा महत्वपूर्ण २ अंक जोडेको छ ।
लेखक
