एजेन्सी । दक्षिण अफ्रिकामा जारी आईसीसी महिला टि–२० विश्वकपमा न्युजिल्याण्डले बंगलादेशमाथि ७१ रनको जित हात पारेको छ ।
शुक्रवार राति भएको खेलमा १९० रनको विजयी लक्ष्य पछ्याएको बंगलादेश २० ओभर खेल्दा ८ विकेटको क्षतिमा ११८ रनमै समेतिएसंगै न्युजिल्याण्डले जितेको हो ।
न्युल्याण्ड क्रिकेट मैदानमा भएको खेलमा बंगलादेशका लागि शोर्ना अक्टरले २२ बलमा ४ चौका प्रहार गर्दै ३१ रन बनाउँदा मुर्शिदा खातुनले ३८ बलमा ३ चौका मद्दतमा ३० रन जोडिन् ।
त्यस्तै, विकेटकिपर शामिमा सुल्तानले ११ बलको सामना गर्दा १ चौका र १ छक्का प्रहार गर्दै १४ रन बनाउँदै आउट भईन् ।
अन्य ब्याटरले दोहोरो अंकमा रन जोड्न सकेनन् । कप्तान निगार सुल्ताना ८ रनमा पेविलियन फर्किदा सोभाना मोस्ट्रे ४ रनमा आउट भईन् ।
त्यस्तै, रितु मोनी ५ रन, नाहिदा अक्टर र रुमाना अहम्मद समान २ रनमा आउृट भईन् । सल्मा खातुन १ रनमा अविजित रहिन् । बंगलादेशले १७ रन अतिरिक्त रुपमा जोड्यो ।
न्युजिल्याण्डका लागि इडेन कार्सनले ३ विकेट लिँदा हनाह रोउले २ विकेट लिईन् । त्यस्तै, ल्या तहुहु र अमेलिया केरले १–१ विकेट हात पारिन् ।
त्यसअघि टस जितेर पहिला ब्याटिङमा उत्रिएको न्युजिल्याण्ड निर्धारित २० ओभरमा ३ विकेट गुमाउँदै १८९ रन बनाएको थियो ।
न्युजिल्याण्डका लागि सुजी बेट्सले अविजित रहँदै ६१ बलमा ७ चौका र १ छक्काको मद्दतमा सर्वाधिक ८१ रन बनाईन् ।
त्यस्तै, विकेटकिपर बेर्नादिन बेजुइडेनआउटले २६ बल खेल्दै ४ चौका मद्दतमा ४४ रन जोडिन् । म्यादि ग्रीनले २० बलको सामना गर्दा ७ चौका प्रहार गर्दै ४४ रनमा अविजित रहँदा एमेलिया केरले १३ बलमा १ चौका प्रहार गर्दै १६ रन बनाउँदै आउट भईन् ।
कप्तान सोफिया डेभिन भने शुन्य रनमा पेविलियन फर्किईन् । न्युजिल्याण्डले अतिरिक्त रुपमा ४ रन प्राप्त गर्यो ।
बंगलादेशका लागि फाहिमा खातुनले २ विकेट लिँदा १ विकेट शोर्ना अक्टरले हात पारिन् ।
प्रतियोगितामा पहिलो जित निकालेको न्युजिल्याण्डले ३ खेलमा २ अंक जोडेको छ । यता, बंगशालदेश भने ३ वटै खेलमा पराजित भयो । समूह ‘ए’ मा न्युजिल्याण्ड तालिकाको चौथौं स्थानमा रहँदा बंगलादेश पाँचौं स्थानमा छ ।
लेखक
