एजोसी । म्यानचेस्टर सिटीले इंग्लिस प्रिमियर लिगअन्तर्गत खेलमा न्युक्यासल युनाइटेडमाथि प्रतिस्पर्धात्मक जित हासिल गरेको छ ।
सनिवार राति भएको खेलमा साविक विजेता म्यानचेस्टर सिटीले न्युक्यासल युनाइटेडमाथि ३–२ को प्रतिस्पर्धात्मक जित हासिल गरेको हो ।
न्युक्यासलको घरेलु मैदान सेन्ट जेम्स पार्क रंगशालामा भएको खेलमा भ्रमणकारी सिटीका लागि बर्नाडो सिल्भा, केभिन डि ब्रुएना र ओस्कार बबले गोल गरे ।
यता, घरलु टोली न्युक्यासलका लागि एलेक्जान्डर इसाक र एन्टोनी गोर्डनले गोल फर्काए ।
रोमाञ्चक खेलको २६ औं मिनेटमा केल वाल्करको पासमा सिल्भाले गोल गर्दै सिटीलाई सुरुवाती अग्रता दिलाए ।
तर, ३५ औं मिनेटमा ब्रुनो गुइमारेसको पासमा इसाकले गोल फर्काउँदा घरेलु टोली १–१ को बराबरीमा आयो ।
त्यसको दुई मिनेटपछि नै ड्यानियल बुर्नको पासमा गोर्डनले गोल गर्दा न्युक्यासल २–१ ले अघि बढ्यो ।
त्यसपछि थप रोमाञ्चक बनेको खेलमा सिल्भाको स्थानमा परिवर्तित खेलाडीका रुपमा मैदान छिरेका डि ब्रुएनाले रोड्रीको पासमा गोल फर्काउँदै सिटीलाई खेलमा २–२ को बराबरीमा ल्याए ।
यता, खेलको अन्तिम समयतिर निर्धारित ९० मिनेटपछि थपिएको इन्जुरी समयको पहिलो मिनेटमा डि ब्रुएनाकै पासमा बबले गोल गर्दै सिटीलाई ३–२ ले जिताए ।
प्रतिस्पर्धात्मक जितसंगै सिटीले २० खेलमा ४३ अंक जोड्दै लिग तालिकाको दोस्रो स्थानमा उक्लिएको छ ।
पराजित न्युक्यासल भने समान २१ खेलमा २९ अंकसहित तालिकाको १० औं स्थानमा झरेको छ ।
लेखक
