एजेन्सी । नेडरल्याण्ड्सले युईएफए नेसन्स लिगअन्तर्गत खेलमा बोस्निया एण्ड हर्जगोभिनामाथि फराकिलो जित निकालेको छ ।
सनिवार राति भएको खेलमा बलियो नेडरल्याण्ड्सले तुलनात्मक रुपमा कमजोर प्रतिद्वन्दी बोस्निया एण्ड हर्जगोभिनामाथि ५–२ को फराकिलो जित निकालेको हो ।
डच टोलीको घरेलु मैदान पिलिप्स स्टेडियममा भएको खेलमा घरेलु टोलीको जितमा जोसुआ जिक्र्जी, तिजानी रैजिन्डर्स, कोडी गाक्पो, वाउट वेगहर्स्ट र जाभी सिमोन्सले गोल गरे ।
पराजित भ्रमणकारी टोलीका लागि भने इडेन डेज्को र इर्मेडिन डिमिरोभिकले गोल फर्काए ।
खेल सुरु भएको १३ औं मिनेटमा जिक्र्जीले गोल गर्दै घरेलु टोलीलाई सुरुवाती अग्रता दिलाए ।
तर, २७ औं मिनेटमा डेनिस हुसैन्बेसिकको असिस्टमा डिमिरोभिकले बोस्नियाका लागि गोल फर्काउँदा खेल १–१ को बराबरीमा आयो ।
त्यस्तै, पहिलो हाफको इन्जुरी समयको दोस्रो मिनेटमा जिक्र्जीको पासमा रैजिन्डर्सले गोल थप्दा नेडरल्याण्ड्स २–१ ले अघि बढ्यो ।
यता, दोस्रो हाफको ५६ औं मिनेटमा रैजिन्डर्सको पासमा गाक्पोले गोल गर्दा डच टोली ३–१ ले अघि बढ्यो ।
तर, खेलको ७३ औं मिनेटमा इस्मिर बज्राकटारेभिकको पासमा डेज्कोले भ्रमणकारी टोलीका लागि गोल फर्काउँदा खेल ३–२ को अवस्थामा आयो ।
यता, ८८ औं मिनेटमा वेगहर्स्टले घरेलु टोलीका लागि गोल गर्दा डच टोली ४–२ ले अघि बढ्यो ।
खेलको इन्जुरी समयको दोस्रो मिनेटमा सिमोन्सले गोल थप्दा नेडरल्याण्ड्स ५–२ ले विजयी भयो ।
फराकिलो जितसंगै डच टोलीले समूह ‘ए३’ मा महतवपूर्ण ३ अंक जोडेको छ ।
लेखक
