भक्तपुर । नेपाल साफ यु–२० च्याम्पियनसिपको फाइनलमा प्रवेश गरेको छ ।
आईतवार दिउँसो भएको सेमिफाइनल खेलमा भुटानलाई ट्राइब्रकेरमा ४–१ ले पराजित गर्दै नेपाल फाइनलमा प्रवेश गरेको हो ।
ललितपुरको सातदोबाटोस्थित एन्फा कम्प्लेक्स मैदानमा भएको खेलमा नेपाललाई उपाधि नजिक पु¥याउन गोलकिपरसमेत रहेका कप्तान जियारथ शेखले महत्वपूर्ण भूमिका निर्वाह गरे ।
जियारथले भुटानका जिग्मे नाम्गेल र उगेन डोर्जीको पेनाल्टी प्रहार उत्कृष्ट डाइभ गर्दै बचाउनुका साथै नेपालका लागि चौथौं पेनाल्टीमा गोल समेत गरे ।
नेपालका लागि राम थापा, अभिनाश स्याङताङ र सिमान्त थापाले पनि पेनाल्टी सुटआउटमा गोल गरे ।
भ्रमणकारी टोली भुटानका लागि भने जेत्सुङ दोर्जीलेमात्रै पेनाल्टीमा गोल गर्न सक्यो ।
त्यसअघि निर्धारित ९० मिनेटको खेल १–१ को बराबरीमा सकियो ।
पहिलो हाफ गोलरहित बराबरीमा सकिएको खेलमा दोस्रो हाफको ५६ औं मिनेटमा जेत्सुन डोर्जीको गोलमार्फत् भुटानले १–० को अग्रता लियो ।
तर, ७६ औं मिनेटमा किनजाङ तेन्जिङले दोहोरो पँहेलो कार्ड खाँदै मैदानबाट बाहिरिदा भुटान १० खेलाडीमा समेतियो ।
जसको भरपुर फाइदा नेपालले उठायो । त्यसको दुई मिनेटपछि नै नेपाल खेलमा फर्कियो ।
खेलको ७८ औं मिनेटमा लक्षु थापाको लामो दुरीको पासमा निराजन धामीले हेडमार्फत् गोल गर्दै खेललाई १–१ को बराबरीमा ल्याए ।
त्यसपछि खेलमा थप गोल नभएपछि खेलको निर्णय पेनाल्टी सुटआउटमार्फत् लिइयो ।
अब नेपालले उपाधिका लागि दोस्रो सेमिफाइनलका विजेतासंग फाइनलमा खेल्नेछ ।
दोस्रो सेमिफाइनल खेल सोमवार भारत र बंगलादेशबीच हुनेछ ।
लेखक
