भक्तपुर । विश्व क्रिकेटको लोकप्रिय प्रतियोगिता आईसीसी टि–२० विश्वकप २०२४ सुरु हुन अब केहि सातामात्र बाँकी छ ।
संयुक्त राज्य अमेरिका र वेस्ट इन्डिजले संयुक्त रुपमा आयोजना गर्ने प्रतियोगितामा नेपालसहित २० टोलीको सहभागिता हुनेछ ।
यसअघिको संस्करणसम्म भने १६ टोलीको सहभागिता रहेको थियो ।
अन्तर्राष्ट्रिय क्रिकेट परिषद् (आईसीसी) ले टि–२० ढाँचाको प्रतियोगितामा यसै संस्करणबाट ४ टोली थप्दै २० टोली सहभागी हुने गरी प्रतियोगिता सञ्चालन गर्ने तयारी गरेको हो ।
जुन १ देखि २९ तारिखसम्म हुने प्रतियोगितामा अघिल्लो संस्करणको विश्वकपमा शीर्ष ८ मा पुगेका ८ राष्ट्रहरु (इंग्ल्याण्ड, अष्ट्रेलिया, भारत, पाकिस्तान, श्रीलंका, दक्षिण अफ्रिका, न्युजिल्याण्ड र नेडरल्याण्ड्स), आयोजकका रुपमा रहेका २ टोली (संयुक्त राज्य अमेरिका र वेस्ट इन्डिज), टि–२० वरियताका आधारमा २ टोली (बंगलादेश र अफगानिस्तान), युरोपेली छनोटबाट २ टोली (आयरल्याण्ड र स्कटल्याण्ड), एसिया छनोटबाट २ टोली (नेपाल र ओमान), अफ्रिकी छनोटबाट २ टोली (नामिबिया र युगान्डा), पुर्व एसिया छनोटबाट पपुवा न्युगिनी (पिएनजी),अमेरिकी महादेशबाट बर्मुडा सहभागी हुँदैछन् ।
९ औं संस्करणको प्रतियोगितालाई ४ समूहमा विभाजन गरिएको छ ।
समूह ‘ए’ मा साविक उपविजेता पाकिस्तानसहित भारत, सह–आयोजक राष्ट्र अमेरिका, क्यानडा र आयरल्याण्ड रहेका छन् ।
त्यस्तै, समूह ‘बी’ मा साविक विजेता इंग्ल्याण्डसहित अष्ट्रेलिया, स्कटल्याण्ड, ओमान र नामिबिया रहेका छन् ।
यता, समूह ‘सी’ मा भने सह–आयोजक वेस्ट इन्डिजसहित न्युजिल्याण्ड, अफगानिस्तान, पिएनजी र युगान्डा रहेका छन् ।
समूह ‘डी’ मा भने नेपालसहित श्रीलंका, बंगलादेश, दक्षिण अफ्रिका र नेडरल्याण्ड्स रहेका छन् ।
समूह चरणका खेल राउन्ड एन्ड रोविन प्रणालीका आधारमा हुनेछ ।
यसअर्थ प्रत्येक समूहमा एक अर्का गरी ४ खेल खेल्नेछन् ।
प्रत्येक समूहको शीर्ष २ मा अताउने टोली सुपर ८ मा प्रवेश गर्नेछन् ।
टि–२० विश्वकपमा नेपालको यो दोस्रो सहभागिता हुनेछ ।
यसअघि १० वर्ष अघि बंगलादेशमा भएको टि–२० विश्वकपमा नेपाल सहभागी भएको थियो ।
लेखक
