भक्तपुर । नेपाल दोस्रो संस्करणको आईसीसी क्रिकेट विश्वकप लिग २ अन्तर्गत त्रिकोणात्मक सिरिजको अन्तिम खेलमा नेडरल्याण्ड्ससंग पराजित भएको छ ।
आईतवार भएको सिरिजअन्तर्गत चौथौं तथा अन्तिम खेलमा घरेलु टोली नेपाल नेडरल्याण्ड्ससंग ८ विकेटले पराजित भएको हो ।
योसंगै जारी सिरिजमा ४ खेलबाट ३ मा हार र १ मा जितको नतिजासहित नेपालले २ अंक जोड्दै तालिकामा तेसो स्थानमा रह्यो ।
यता, डच टोलीले भने समान ४ खेलमा २ मा जित र २ मा हारको नतिजासहित तालिमा ४ अंक जोडेर दोस्रो स्थानमा रह्यो ।
नामिबियाले भने ४ खेलमध्ये ३ मा जित र १ मा हारको नतिजा निकाल्दै ६ अंक जोड्दै अंक तालिकाको शीर्ष स्थानमा रहन सफल भयो ।
काठमाडौंको क्रितिपुरस्थित टियु क्रिकेट मैदानमा भएको खेलमा १७३ रनको सामान्य विजयी लक्ष्यका साथ जवाफी ब्याटिङमा उत्रिएको नेडरल्याण्ड्सले ३७.५ ओभरमा मात्र २ विकेटको क्षतिमा पूरा गरे ।
डच टोलीको जितमा विक्रमजित सिंहले ९२ बलमा ७ चौका प्रहार गर्दै ५८ रनको अर्धशतकिय पारी खेल्दै अविजित रहँदा स्याब्रान्ड इंगेलब्रेच्टले ७५ बल खेल्दै ३ चौका प्रहार गरेर ४६ रन जोड्दै अविजित रहे ।
त्यस्तै, ओपनर ब्याट्सम्यान माइकल लेभिटले ३४ बलमा ३ चौका र ४ छक्का प्रहार गर्दै ३९ रन जोडेर आउट हुँदा अर्का ओपनर म्याक्स ओडोडले २६ बल खेल्नेक्रममा २ चौका र २ छक्का प्रहार गर्दै २८ रन जोडेर पेविलियन फर्किए ।
नेडरल्याण्ड्सले अतिरिक्त रुपमा २ रन जोड्यो ।
नेपालका लागि ललित राजबंशीले १० ओभर बलिङ गर्दै ४२ रन दिएर १ विकेट लिँदा दिपेन्द्र सिंह ऐरीले १० ओभरमा २ मेडन राख्दै ३० रन दिएर १ विकेट लिए ।
त्यसअघि टस हारेर पहिला ब्याटिङमा उत्रिएको नेपालले ४९.३ ओभरमा अलआउट हुँदै १७२ रन जोड्दै नेडरल्याण्ड्सलाई जितका लागि १७३ रनको विजयी लक्ष्य दिएको हो ।
नेपालका लागि ओपनर ब्याट्सम्यान कुशल भुर्तेलले ९३ बलमा ८ चौका प्रहार गर्दै ६६ रनको अर्धशतकिय पारी खेल्दा करण केसीले २७ बलमा १ चौका र २ छक्का प्रहार गर्दै २६ रन जोडेर पेविलियन फर्किए ।
त्यस्तै, आरिफ शेखले ५० बलको सामना गर्दा १ चौका प्रहार गर्दै २२ रन जोडेर आउट हुँदा विकेटकिपर आसिफ शेखले २७ बल खेल्नेक्रममा २ चौका र १ छक्का प्रहार गर्दै १७ रन जोडेर पेविलियन फर्किए ।
यता, कप्तान रोहित पौडेलले ४० बल खेल्नेक्रममा २ चौका प्रहार गर्दै १६ रन जोडेर आउट हुँदा अनिल कुमार साह ७, गुलशन झा ५, कुशल मल्ल २ र दिपेन्द्र सिंह ऐरी १ रनमा पेविलियन फर्किए ।
ललित राजबंशी शुन्य रनमा अविजित रहँदा भिम सार्की भने शुन्य रनमा पेविलियन फर्किए ।
नेपालले अतिरिक्त रुपमा १० रन जोड्यो ।
घरेलु टोली नेपाललाई अलआउट गर्न डच टोलीका लागि आर्यान दत्तले १० ओभर बलिङ गर्नेक्रममा २ मेडन राख्दै १६ रन दिएर ३ विकेट हासिल गर्दा भिभियान किंगमाले १० ओभर बलिङ गर्दै ३९ रन खर्चिएर ३ विकेट लिए ।
त्यस्तै, बास दि लिडले ९.३ ओभर बलिङ गर्दै २९ रन दिएर २ विकेट लिँदा रोयल्फ भान देर मेर्वेले १० ओभर बलिङ गर्दै १ मेडनसहित २३ रन दिएर १ विकेट लिए ।
लेखक
