भक्तपुर । नेपाल क्रिकेट संघ (क्यान) ले आयोजना गर्न लागेको नेपाल टी–२० फ्रेन्चाइज लिगको पहिलो संस्करणमा काठमाडौं नाइट्स भित्रिएको छ ।
यसअघि काठमाडौं गोर्खाज सहभागी हुने जनाइएको थियो । तर, केहि साता अघि काठमाडौं गोर्खाजले नाम फिर्ता लिएपछि उसको सट्टामा क्यानले काठमाडौं नाइट्सलाई आवद्ध गरेको हो ।
नेपाल स्पोर्ट्स भेन्चरको स्वामित्वमा रहने काठमाडौं नाइट्सले लिग खेल्ने तय भएको क्यानले विज्ञप्तीमार्फत जनाएको छ ।
योसँगै लिगमा ६ फ्रेन्चाइज टिमले प्रतिस्पर्धा गर्ने तय भएका छ ।
आईसीसीले आधिकारिक मान्यता दिएको फ्रेन्चाइज प्रतियोगितामा काठमाडौं नाइट्ससंगै विराटनगर सुपर किंग्स, जनकपुर रोयल्स, पोखरा एभेन्जर्स, लुम्बिनी अल स्टार र फार वेस्टर्न युनाइटेड सहभागी हुनेछन् ।
क्यानले नयाँ टिम आवद्ध भए लगत्तै प्रतियोगिता पुस ८ गतेदेखि सुरु गर्ने घोषणा पनि गरेको छ । यसअघि मंसिर २६ गते देखि पुस १६ गतेसम्म गर्ने मिति तोकिएको थियो ।
क्यानले छिट्टै नयाँ खेलतालिका पनि सार्वजनिक गर्ने जनाएको छ ।
लेखक
