भक्तपुर । पहिलो संस्करणको नेपाल टि–२० क्रिकेट लिगको उपाधि लुम्बिनी अल स्टार्सले जितेको छ ।

बुधवार भएको उपाधि भिडन्तमा लुम्बिनीले विराटनगर सुपर किंग्समाथि २४ रनको जित हात पार्दै पहिलो संस्करणको नेपाली फ्रेनचाइज लिगको उपाधि जितेको हो ।

लुम्बिनीले दिएको १३३ रनको सामान्य विजयी लक्ष्य विराटनगरले २० ओभरको खेलमा भेटाउन सकेन । विराटनगर ८ विकेटको क्षतिमा १०९ रनमा समेटियो ।

विकेट किपर समेत रहेका अर्जुन साउदले ४० बलमा सर्वाधिक ३४ रन जोडे । त्यस्तै, पृथु बास्कोटाले २९ बलमा ३१ रन बनाए ।

हुसेन तलातले १३ रन जोड्दा अन्य ब्याटरले दोहोरो अंकमा रन बटुल्न सकेनन् । अमर सिंह रौतेला ८, विवेक यादव र राज रक्की ननान समान ६ रनमा आउट हुँदा गौरान्सु शर्मा ४ रनमा पेविलियन फर्किए ।

यता, नन्दन यादव ३ तथा केइअन जोसेप २ रनमा अविजित रहे । विराटनगरले २ रन अतिरिक्त रुपमा जोडेको थियो ।

यता, उपाधि जित्नका लागि विराटनगरलाई सस्तैमा समेटिन लुम्बिनीका सागर ढकाल र हर्मित सिंहले २–२ विकेट लिए । त्यस्तै, किशोर महतो र बिपुल शर्माले १–१ विकेट लिए ।

त्यसअघि फाइनल खेलमा टस जित्दै पहिला ब्याटिङमा उत्रिएको लुम्बिनीले १९.२ ओभरमा अलआउट हुँदै १३३ रन बनाएको थियो ।

लुम्बिनीका लागि सुरुवाती ब्याटिङमा आएका विकेटकिपर लाहिरु मिलान्थाले २८ बल खेल्दै सर्वाधिक ४१ रन बनाए । त्यस्तै, हर्मित सिंहले १८ बलमा ३० रन जोडे ।

कप्तान दिपेन्द्र सिंह ऐरी २३ बलमा २० रन जोड्दै आउट हुँदा इसान पाण्डेले २२ बलमा १८ रनमात्र जोड्न सके । अन्य ब्याट्सम्यानले दोहोरो अंकमा रन जोड्न सकेन ।

अनिल साह ८, बिपुल शर्मा ५, गुल्शन झा ३, किशोर महतो २ तथा कुशल भुर्तेल र साड्ले भान स्चाल्विक समान १ रनमा आउट भए ।

विराटनगरका लागि नन्दन यादव र राज रक्की ननानले समान २–२ विकेट लिए । त्यस्तै, कप्तान रोहित पौडेल, सुर्य तामाङ, केइअन जोसेप र हुसेन तलातले १–१ विकेट लिए ।

लुम्बिनीले उपाधिसंगै नगद रु. ५० लाख जितेको छ । उपविजेता विराटनगरले पनि ३० लाख नगद पुरस्कार जित्यो ।

६ फ्रेनचाइज टोलीको सहभागिता रहेको टि–२० लिगको विधागत उत्कृष्ट खेलाडीहरुलाई पनि सम्मान गरिएको थियो ।

फार वेस्ट युनाइटेडका हस्मुतुल्लाह शाहिदी प्लेयर अफ द लिग घोषित हँदा काठमाडौं नाइट्सका अभिनाश बोहरा बेस्ट बलर घोषित भए ।

इर्मजिङ प्लेयर विराटनगरका सुर्य तामाङ घोषित हुँदा हुनेस तलात भए । फाइनल खेलको प्लेयर अफ द म्याच हर्मित सिंह चुनिए ।

लेखक

प्रतिकृया दिनुहोस्

Please enter your comment!
Please enter your name here
This site is protected by reCAPTCHA and the Google Privacy Policy and Terms of Service apply.

The reCAPTCHA verification period has expired. Please reload the page.