भक्तपुर । पहिलो संस्करणको नेपाल टि–२० क्रिकेट लिगको उद्घाटन खेलमा काठमाडौं नाइट्सले विजयी सुरुवात गरेको छ ।
सनिवार भएको खेलमा काठमाडौंले पोखरा एभन्जर्समाथि २६ रनको जित हात पारेको हो ।
काठमाडौंस्थित टियू क्रिकेट मैदानमा भएको खेलमा काठमाडौंले दिएको १६३ रनको विजयी लक्ष्य पछ्याउने क्रममा पोखरा निर्धारित १९ ओभरमा ७ विकेट गुमाएर १३७ रनमा समेटियो ।
पोखराका लागि उपल थरङगाले ३४ बलमा ६ चौकासहित सर्वाधिक ४४ रनको योगदान दिए ।
आरिफ शेखले २० बलमा २ चौकासहित २० रन बनाउँदा अमिर हमाज र अभिमन्यु मिथुनले समान १८–१८ रन बनाए ।
त्यस्तै, सिद्धान्त लोहनी ७ बलमा १३ रन बनाउँदै आउट हुँदा कप्तान सरद भेष्वाकरले ६ रनको योगदान गरे ।
काठमाडौंका अभिनाश बोहराले ३ विकेट लिए । त्यस्तै, बसिर अहमदले २ विकेट लिँदा अनिल खरेलले १ विकेट लिए ।
यसअघि पोखराले टस जित्दै काठमाडौंलाई ब्याटिङको निम्तो दिएको थियो । अज्मत ओमारजाइको आक्रमक ब्याटिङ प्ररित काठमाडौंले निर्धारित १९ ओभरको खेलमा ५ विकेटको क्षतिमा १६२ रन बनाएका थिए ।
खराब सुरुवात गरेको काठमाडौंले ४८ रन बनाउँदै गर्दा ५ विकेट गुमाइसकेको थियो । त्यसपछि सुनाम गौतम र ओमारजाइले ११४ रनको साझेदारी गरेपछि काठमाडौंले समानजनक योगफल तयार पारेका थिए ।
ओमारजाइले ४२ बलमा ३ चौका र ७ छक्का प्रहार गर्दै सर्वाधिक ८५ रनको योगदान गर्दै अविजित रहँदा सुनामले २८ बल खेल्दै २ चौकासहित २७ रन जोड्दै अविजित रहे ।
यता, एलेक्स ब्लेक्सले २१ रन, विरेनदिप सिंहले १० रन बनाउँदा कप्तान ज्ञानेन्द्र मल्ल शून्य रनमा आउट भए ।
पोखराका लागि प्रतिश जिसी र जाहिर खानले समान २–२ विकेट हात पार्दा मौसम ढकालले एक विकेट आफ्नो नाममा पारे ।
प्रतियोगिताअन्तर्गत दोस्रो खेलमा लुम्बिनी अल स्टार्स र फार वेस्ट युनाइटेड टियू क्रिकेट मैदानमा आजै आमनेसामने हदैछ । यो खेल दिउँसो सवा १ बजे हुनेछ ।
लेखक
