भक्तपुर । नेपालले विश्व टेबलटेनिस च्याम्पियनसिपअन्तर्गत दक्षिण एसियाली क्षेत्रीय टेबलटेनिस छनोट प्रतियोगिता आयोजना गर्ने भएको छ ।
प्रतियोगितामा नेपालसहित भारत, पाकिस्तान, बंगलादेश, श्रीलंका र माल्दिभ्स गरी ६ राष्ट्रको सहभागिता हुनेछ ।
प्रतियोगितामा प्रत्येक राष्ट्रबाट ५–५ पुरुष र महिला खेलाडी सहभागी हुने बताइएको छ । पुरुष र महिला सिंगल्स लिग कम नकआउट आधारमा हुनेछ ।
नेपालबाट पुरुषमा रुविन महर्जन, प्रदीप रोक्का, संयोग कपाली, विनेश बानियाँ र शिवसुन्दर गोथेले प्रतिस्पर्धा गर्ने छन् ।
महिलामा नवीता श्रेष्ठ, एलिना महर्जन, रविना महर्जन, शिखा सुवाल र इभाना थापा मगरले खेल्ने छन् । खेलाडीलाई मुख्य प्रशिक्षक सन्जिव ढुंगेलको नेतृत्वमा सञ्जय अर्याल र सन्ध्या शाक्यले प्रशिक्षण गराइ रहेका छन् ।
शंकर गौतमले प्रतियोगिता निर्देशक, तेजेन्द्रसिंह महराले कम्पिटिसन म्यानेजर र आयोजक संघका प्रथम उपाध्यक्ष धम्रमान वज्राचार्यले व्यवस्थापन समितिको जिम्मेवारी पाएका छन् ।
प्रतियोगिता मंसिर २२ देखि २५ गतेसम्म लैनचौरस्थित राष्ट्रिय टेबलटेनिस प्रशिक्षण केन्द्रमा हुने आयोजक अखिल नेपाल टेबलटेनिस संघका अध्यक्ष चतुरानन्द राज वैद्यले मंगलबार आयोजित पत्रकार सम्मेलनमा जानकारी गराए ।
लेखक
