भक्तपुर । श्रीलंकामा जारी एसीसी इमर्जिङ टिम्स एसिया कपअन्तर्गत समूह चरणको अन्तिम खेलमा नेपालले युनाइटेड अरब इमिरेट्स (युएई) ‘ए’ लाई १५७ रनमा रोकेको छ ।
कोलोम्बोस्थित पि. सारा ओभल रंगशालामा जारी खेलमा टस जितेर युएई ‘ए’ पहिला ब्याटिङमा उत्रिएको थियो ।
तर नेपाली बलरहरु चम्किँदा युएई ४४ ओभरमा अलआउट हुँदै मात्र १५७ रनमा समेतियो । नेपालले अब जितका लागि १५८ रनको मध्यम लक्ष्य पछ्याउनेछ ।
युएईका लागि लभप्रित सिंहले ८२ बलमा ६ चौका र १ छक्का प्रहार गर्दै सर्वाधिक ५२ रनको अर्धशतकिय पारी खेल्दा इथान डिसुजाले २५ बल खेल्नेक्रममा २ चौका र १ छक्का प्रहार गर्दै १८ रन जोडे ।
त्यस्तै, अश्वन्त भालथापाले ३२ बलमा १ चौका प्रहार गर्दै १६ रन जोड्दै पेविलियन फर्किदा विकेटकिपर आयान्स शर्माले ३० बलमा २ चौका प्रहार गर्दै १४ रन जोड्दै आउट भए ।
यता, जस जियानीले २५ बलमा १ चौका प्रहार गर्दै १३ रन जोड्दै पेविलियन फर्किदा निलान्श केस्वान ९, मोहम्मद फाराजुद्दिन र फाहाद नवाज समान ४–४, अन्श तण्डन ३ र कप्तान अली नासिर १ रनमा पेविलियन फर्किए ।
मोहम्मद जवादुल्लाह १ रनमा अविजित रहे । युएईले अतिरिक्त रुपमा २२ रन जोड्यो ।
युएईलाई सस्तैमा समेत्न नेपालका लागि कुशल भुर्तेलले १० ओभर बलिङ गर्दै ४० रन दिएर सर्वाधिक ६ विकेट हात पारे ।
त्यस्तै, श्याम ढकालले ९ ओभर बलिङ गर्नेक्रममा ४४ रन दिएर २ विकेट लिँदा कुशल मल्लले ५ ओभरमा १७ रन दिएर १ विकेट लिए ।
यता, पवन सराफले १० ओभर बलिङ गर्दै ३ मेडन राखेर १९ रन दिँदै १ विकेट लिए ।
लेखक
