भक्तपुर । नेपालले भारतमा जारी एसएमएस फ्रेन्डसिप कप टि–२० सिरिजको उपाधि जितेको छ ।
आईतवार भएको फाइनल खेलमा नेपालले घरेलु टोली गुजरातलाई १८ रनले पराजित गर्दै एसएमएस फ्रेन्डसिप कप टि–२० सिरिज जितेको हो ।
गुजरातको भापीस्थित साई मेघपन स्पोर्ट्स लाइफ मैदानमा भएको फाइनल खेलमा नेपालले दिएको १७७ रनको विजयी लक्ष्यका साथ जवाफी ब्याटिङमा उत्रिएको गुजरातले निर्धारित २० ओभरको खेलमा ८ विकेट गुमाउँदै मात्र १५८ रन जोड्न सक्यो ।
गुजरातका लागि कप्तान उमंग तान्दुलले ४० रन जोड्दा आर्या देसाईले ३६ रन जोडेर पेविलियन फर्किए ।
त्यस्तै, जयमित पटेल १३, रुद्र पटेल १७, हर्ष देसाई १३, तेजेश पटेल ६, स्मित पटेल ४ र प्रियान्स पटेल १ रनमा आउट भए ।
यता, जाला युवराज सिंह र सरल समान १०–१० रनमा अविजित रहँदा गुजरातले अतिरिक्त रुपमा ४ रन जोड्यो ।
गुजरातमाथि जित निकाल्न नेपालका लागि अबिनाश बोहराले सर्वाधिक ३ विकेट लिँदा दिपेन्द्र सिंह ऐरीले २ विकेट लिए ।
त्यस्तै, करण केसी र कुशल मल्लले १–१ विकेट लिँदा अर्को १ विकेट रनआउटमार्फत् नेपालले प्राप्त गर्यो ।
त्यसअघि टस जितेर पहिला ब्याटिङमा उत्रिएको नेपालले निर्धारित २० ओभरको खेलमा ४ विकेट गुमाउँदै १७६ रन जोड्यो ।
नेपालका लागि कप्तान रोहित पौडेलले ४७ बलमा ५ चौका र ४ छक्का प्रहार र्गै सर्वाधिक ७४ रनको अर्धशतकिय पारी खेल्दा विकेटकिपर आसिफ शेखले ३४ बल खेलदै १ चौका र १ छक्का प्रहार गर्दै ३४ रन जोडेर पेविलियन फर्किए ।
त्यस्तै, कुशल मल्लले १३ बलमा ३ चौका र १ छक्का प्रहार गर्दै ३१ रन जोडेर अविजित रहँदा ओपनर कुशल भुर्तेलले २१ बल खेल्दै २ चौका र १ छक्का प्रहार गर्दै १९ रन जोडेर पेविलियन फर्किए ।
यता, दिपेन्द्र सिंह ऐरी ७ रनमा पेविलियन फर्किदा सुन्दिप जोरा ७ रनमा अविजित रहे ।
नेपालले अतिरिक्त रुपमा ४ रन जोड्यो ।
गुजरातका लागि तेजेश पटेल, शेन पटेल, जयमित पटेल र जाला युवराज सिंहले समान १–१ विकेट लिए ।
नेपालले आसन्न टि–२० विश्वकप र एसीसी प्रिमियर कपको तयारीका लागि भारतमा त्रिपक्षिय सिरिज खेलेको हो ।
लेखक
