भक्तपुर । तेस्रो तथा अन्तिम एकदिवसीय अन्तराष्ट्रिय क्रिकेटमा रोमाञ्चक ६ विकेटको जितसंगै नेपालले सिरिज २–१ ले जितेको छ ।
शुक्रवार घरेलु टोली नेपालले युएईले दिएको १७७ रनको मध्यम लक्ष्य पुरा गरेको हो । नेपालका लागि आसिफ शेख र ज्ञानेन्द्र मल्लले अर्धशतकीय पारी खेले ।
क्रितिपुरस्थित टियू क्रिकेट मैदानमा नेपालले टस जित्दै युएईलाई व्याटिङको लागि निम्त्याएको थियो । जसमा युएईले ५० ओभर खेल्दै ९ विकेट गुमाउँदै १७६ रन बनाएको थियो ।
युएईका लागि आयन अफजल खानले अविजित ५४ रनको अर्धशतकीय पारी खेले । त्यस्तै, हजरत बिलालले २० रनको योगदान दिँदै अविजित रहे । अलिशन शराफुले ३३ रनको योगदान गर्दा रोहन मुस्तफाले २४ तथा मुहमद वासिमले ११ रन बनाए ।
एक समय युएई ९३ रनमा ९ विकेट गुमाइसकेको अवस्था थियो । त्यस्तो अवस्थामा युएईका लागि आयन र हजरतले अन्तिम विकेटका लागि ८३ रनको साझेदारी गरे।
नेपालका लागि गुलशन झा, दीपेन्द्र सिंह ऐरी र कुशल भुर्तेलले २–२ विकेट लिदा सोमपाल कामी र ललित राजवंशीले १–१ विकेट लिए ।
यता १७७ रनको विजयी लक्ष्य पछ्याउने क्रममा ४० औं ओभर खेल्दै ४ विकेटको क्षतिमा लक्ष्य पुरा गर्यो । नेपालको जितमा आरिफ सेखले अविजित ८८ रनको योगदान दिँदा ज्ञानेन्द्र मल्लले पनि महत्वपूर्ण ६४ रनको योगदान गरे ।
नेपाली कप्तान रोहित पौडेलले १० रन बनाउँदा अर्जुन साउदले ९ रन जोडे । यता, दीपेन्द्र सिंह ऐरी भने विना रनमा रन आउट भए । युएईका हजरत बिलाल र आयन अफजल खानले १–१ विकेट लिए ।
यसअघि पहिलो खेलमा नेपाल ४८ रनले पराजित भएको थियो । त्यसपछि दोस्रो खेलमा नेपालले ३ विकेटको महत्वपूर्ण जित हात पार्दै सिरिजलाई १–१ को बराबरीमा ल्याएको थियो ।
लेखक
