भक्तपुर । काठमाडौंमा जारी आईसीसी विश्वकप लिग २ त्रिकोणात्मक सिरिजअन्तर्गत नामिबियाविरुद्वको खेल नेपालले जितेको छ ।
सनिवार भएको खेलमा नेपालले नामिबियालाई ३ विकेटले पराजित गरेको हो ।
क्रितिपुरस्थित टियू क्रिकेट मैदानमा २७५ रनको विजयी लक्ष्य नेपालले ४७.३ ओभर खेल्दै ७ विकेटको क्षतिमा २७८ रन बनाउँदै पूरा गरेको हो ।
नेपालका लागि विकेटकिपर आसिफ शेखले ९८ बलको सामना गर्दै ८ चौका र २ छक्का प्रहार गर्दै सर्वाधिक ८१ रनको पारी खेले ।
त्यस्तै पूर्वकप्तान ज्ञानेन्द्र मल्लले पनि ७४ बल खेल्दै ५ चौका र ३ छक्का प्रहार गर्दै ६२ रन जोडे । युवा खेलाडी कुशल मल्लले ४९ बलमा ६ चौका र ४ छक्का प्रहार गर्दै ६२ रन बनाउँदा कप्तान रोहित पौडेलले ४३ बल खेल्दै ५ चौका मद्दतमा ३९ रन बनाए ।
सुन्दिप जोरा ३ रनमा पेविलियन फर्किदा कुशल भुर्तेल र दिपेन्द्र सिंह ऐरी समान १ रनमा आउट भए । सोमपाल कामी ८ रनमा अविजित रहे ।
भ्रमणकारी टोली नामिबियाका लागि रुबिन ट्रम्पपेल्मेन्टले सर्वाधिक ३ विकेट हात पार्दा बेनार्ड स्कोल्ट्जले २ विकेट लिए । ट्यान्जेनी लुङगामेनी र पिङ्की या फ्रान्सले १–१ विकेट लिए ।
त्यसअघि टस हारेर पहिला ब्याटिङमा ओर्लिएको नामिबियाले निर्धारित ५० ओभर खेल्ने क्रममा ६ विकेटको क्षतिमा २७४ रन बनाएको थियो ।
नामिबियाका लागि जेन ग्रीनले ६३ बल खेल्दै ११ चौका र १ छक्का प्रहार गर्दै अविजित ७५ रन बनाए ।
यता, लोहान्द्रे लौरेन्सले ५४ बल खेल्दै ८ चौका मद्दतमा ४१ रन जोड्दा पिङ्की या फ्रान्सले ३९ बलमा ४ चौका र ३ छक्का प्रहार गर्दै ४९ रनमा रनआउट भए ।
रुबिन ट्रम्पपेल्मेन्टले मात्र ७ बलमा ४ चौका र २ छक्का प्रहार गर्दै अविजित २४ रन जोडे । त्यस्तै, माइकल भान लिङगेन ३५ बलमा २ चौका मद्दतमा २२ रन जोड्दै पेविलिया फर्किदा गेरार्ड इरासमसले २९ बलमा १५ रन बनाए ।
निकोल लोफ्टी इटनले ३० बलमा १४ रन जोड्दा नामिबियाले अतिरिक्त रुपमा १३ रन जोडेको थियो ।
घरेलु टोलीका लागि सन्दिप लामिछानेले ३ विकेट लिँदा करन केसीले १ विकेट हात पारे ।
जारी सिरिजमा नेपालले ३ खेलमा शतप्रतिशत जित आत्मसाथ गर्दा नामिबियाले भने खेलेको ३ वटै खेलमा पराजय बेहोरेको छ । नेपालले यसअघि पनि नामिबियालाई पराजित गरेको थियो ।
लेखक
