भक्तपुर । बलियो नेडरल्याण्ड्समाथि नेपालले दोस्रो संस्करणको आईसीसी क्रिकेट विश्वकप लिग २ अन्तर्गत त्रिकोणात्मक सिरिजको दोस्रो खेलमा शानदार जित हासिल गरेको छ ।
सनिवार भएको खेलमा बलियो एशोसियट राष्ट्र नेडरल्याण्ड्समाथि नेपालले ९ विकेटको शानदार जित हासिल गरेको हो ।
योसंगै नेपालले लिग २ सिरिजमा दुई खेल खेल्दा पहिलो जित निकाल्दै महत्वपूर्ण २ अंक जोडेको छ ।
यसअघि विहिवार भएको खेलमा नेपाल नामिबियासंग ४ विकेट ले पराजित भएको थियो ।
काठमाडौंको क्रितिपुरस्थित टियु क्रिकेट मैदानमा भएको खेलमा १३८ रनको सामान्य विजयी लक्ष्य पछ्याएको नेपालले १५.२ ओभरमा १ विकेट गुमाउँदै ११४ रन जोड्यो ।
नेपालको ऐतिहासिक जितमा ओपनर ब्याट्सम्यान आसिफ शेख र अनिल शाहले शतकिय साझेदारी गर्दै जित दिलाए ।
नेपालले पहिलो पावर प्लेमा १ विकेटको क्षतिमा १०० रनको शतक बनाउँदै विष्पोटक पारी खेल्दै जितको आधार तय गर्यो ।
नेपालको जितमा आसिफ शेखले ४५ बलमा ८ चौका र १ छक्का प्रहार गर्दै ५४ रनको अर्धशतकिय पारी खेल्दै अविजित रहँदा अनिल साहले ३६ बल खेल्नेक्रममा ६ चौका र ४ छक्का प्रहार गर्दै ५७ रन जोडेर अविजित रहे ।
त्यस्तै, अर्का ओपनर कुशल भुर्तेलले ११ बलमा २ चौका र ३ छक्का प्रहार गर्दै २८ रन जोडेर पेविलियन फर्किए ।
नेपालले अतिरिक्त रुपमा २ रन जोड्यो ।
डच टोलीका लागि भिभियान किंगमाले ३ ओभर बलिङ गर्दै २८ रन दिएर १ विकेट लिए ।
त्यसअघि टस जितेको नेपालले नेडरल्याण्ड्सलाई पहिला ब्याटिङमा निम्त्याएपछि नेडरल्याण्डले ३९ ओभरको खेलमा अलआउट हुँदै १३७ रन जोड्यो ।
डच टोलीका लागि कप्तान स्कट इवार्ड्सले ४९ बलमा १ चौका प्रहार गर्दै ३३ रन जोडेर पेविलियन फर्किदा बास दि लिडले ४४ बल खेल्नेक्रममा ३ चौका र १ छक्का प्रहार गर्दै २७ रन जोडेर आउट भए ।
त्यस्तै, स्याब्रान्ड इगलब्रेच्टले ३५ बलमा ३ चौका प्रहार गरेर २३ रन जोड्दा नोह क्रोएसले २४ बलमा १ चौका मद्दतमा १२ रन जोडेर रनआउट भए ।
यता, म्याक्स ओडोड १० रनमा रनआउट हुँदा आर्यान दत्त पनि १० रन जोडेर पेविलियन फर्किए ।
केयल क्निल ११ रनमा अविजित रहँदा भिभियान किंगमा २ र शारिज अहमद १ रनमा पेविलियन फर्किए ।
डच टोलीले अतिरिक्त रुपमा ८ रन जोड्यो ।
नेडरल्याण्ड्सलाई सस्तैमा अलआउट गर्न नेपालका लागि कुशल भुर्तेलले ७ ओभर बलिङ गर्दै २० रन दिएर सर्वाधिक ४ विकेट लिँदा ललित राजबंशीले १० ओभर बलिङ गर्नेक्रममा ३२ रन खर्चिएर २ विकेट लिए ।
त्यस्तै, सोमपाल कामीले ७ ओभर बलिङ गर्नेक्रममा २ मेडन राख्दै २४ रन दिएर १ विकेट लिँदा कप्तान रोहित पौडेलले १ ओभर बलिङ गर्दै मात्र ३ रन दिएर १ विकेट लिए ।
सिरिजअन्तर्गत नेपालले तेस्रो खेल नामिबियासंग बुधवार खेल्नेछ ।
लेखक
