एजेन्सी । भारत र न्युजिल्याण्डबीचको टि–२० आई सिरिजको तेस्रो तथा निर्णायक खेलमा भारतले न्युजिल्याण्डमाथि १६८ रनको फाराकिलो जित हात पारेको छ । जितसंगै टि–२० सिरिज २–१ ले भारतले जितेको छ ।
३ खेलको टि–२० सिरिजमा यसअघि न्युजिल्याण्डले पहिलो खेल जित्दा भारतले दोस्रो खेल जितेको थियो ।
सिरिजअन्तर्गत बुधवार भएको तेस्रो खेलमा २३५ रनको विशाल लक्ष्य पछ्याउने क्रममा न्युजिल्याण्ड १२.१ ओभरमा अलआउट हुँदै मात्र ६६ रनमा समेतियो ।
न्युजिल्याण्डका लागि डर्याल मिट्चेलले २५ बलमा १ चौका र ३ छक्का प्रहार गर्दै सर्वाधिक ३५ रनको योगदान दिए ।
त्यस्तै, कप्तान मिट्चेल सान्टनेरले १३ रन जोड्दा अन्य ब्याट्सम्यानले दोहोरो अंकमा रन जोड्न सकेनन् । मिचेल ब्रासवेलले ८, फिन एलिनले ३ रन जोडे ।
भ्रमणकारी टोलीको ब्याटिङलाई धरासायी बनाउने क्रममा भारतका लागि कप्तान हार्दिक पाण्डेयाले सर्वाधिक ४ विकेट लिए । त्यस्तै, अशदिप सिंह, उम्रान मलिक र शिभम माभीले समान २–२ विकेट लिए ।
त्यसअघि अहम्दाबादस्थित नरेन्द्र मोदी रंगशालामा टस जितेर पहिला ब्याटिङमा उत्रिएको घरेलु टोलीले निर्धारित २० ओभरको खेलमा ४ विकेटको क्षतिमा २३४ रनको विशाल योगफल तयार पार्यो ।
भारतका लागि शुभम गिलले अविजित रहँदै सर्वाधिक १२६ रनको योगदान दिए । उनले ६३ बलको सामना गर्दा १२ चौका र ७ छक्का प्रहार गरेका थिए ।
त्यस्तै, राहुल त्रिपाठीले २२ बलमा ४ चौका र ३ छक्का मद्दतमा ४४ रन बनाए ।
कप्तान पाण्डेयाले १७ बल खेल्नेक्रममा ४ चौका र १ छक्का प्रहार गर्दै ३० रन जोड्दै पेबिलियन फर्किदा सुर्यकुमार यादवले १३ बल खेल्दै १ चौका र २ छक्का प्रहार गर्दै २४ रन जोडे । अन्य भारतिय ब्याटरले दोहोरो अंकमा रन बटुल्न सकेनन् ।
न्युजिल्याण्डका लागि कप्तान सान्टनेर, ब्रासवेल, डर्याल मिट्चेल र ब्लाइर टिक्नेरले समान १–१ विकेट लिए ।
भारतिय कप्तान हार्दिक पाण्डेया प्लेयर अफ द सिरिज घोषित हुँदा सुभम गिल खेलको प्लेयर अफ द म्याच चुनिए ।
लेखक
